काठमाडौ – इरानले कतारको सनैयास्थित अमेरिकी सैन्य अड्डालाई लक्षित गरी सोमबार साँझ मिसाइल प्रहार गरेपछि कतारमा त्रासको वातावरण सिर्जना भएको छ। अन्तर्राष्ट्रिय सञ्चारमाध्यमका अनुसार, इरानले ५० भन्दा बढी मिसाइल प्रहार गरेको थियो, तर अमेरिकी सेनाले ती मिसाइलहरूलाई आकाशमै निष्क्रिय पारेको दाबी गरेको छ। यो घटनाले कतारमा कार्यरत करिब ४ लाख नेपाली कामदारहरूमा बेचैनी बढाएको छ।
स्थानीय समयअनुसार सोमबार साँझ ७:५५ बजे भएको आक्रमणपछि कतारी विदेश मन्त्रालयले अन्तर्राष्ट्रिय उडानहरू अस्थायी रूपमा बन्द गरेको घोषणा गरेको छ। कतार एयरवेज, नेपाल एयरलाइन्स र हिमालयन एयरलाइन्सलगायतका व्यावसायिक उडानहरू अर्को सूचना नआएसम्म स्थगित भएका छन्। दोहामा बस्ने एक नेपाली प्रत्यक्षदर्शीले भने, “आकाशमा ठूलो आवाजसहित ५० भन्दा बढी झिल्काहरू देखिए, तारा खसे जस्तो। भूकम्पको जस्तो आवाज आयो, तर मिसाइलहरू माथि नै नष्ट गरियो।”
घटनाले कतारको हवाई क्षेत्रमा उच्च सतर्कता अपनाइएको छ, र अमेरिकी सैन्य अड्डा वरपर सुरक्षा व्यवस्था कडा पारिएको छ। कतारका प्रमुख बजारहरू बन्द गरिएका छन्, र सर्वसाधारण घरभित्रै बेचैन अवस्थामा छन्। कतारमा कार्यरत नेपाली कामदार सुरेश भट्टले भने, “हवाई क्षेत्र खुला भएको छ, तर यहाँको माहोल अझै तनावपूर्ण छ। राति थप हानाहान भए कतार असुरक्षित हुन सक्छ।”
नेपाली दूतावास कतारका अनुसार, उक्त देशमा करिब ४ लाख नेपाली कार्यरत छन्। घटनापछि दूतावासले नेपालीहरूलाई सुरक्षित रहन र आधिकारिक सूचना पर्खन आग्रह गरेको छ। इरानको आक्रमणपछि अमेरिकाले जवाफी कारबाही गर्न सक्ने आशंकाले स्थानीय स्तरमा थप त्रास बढेको छ।
यो घटना अमेरिकी राष्ट्रपति डोनाल्ड ट्रम्पले इरान र इजरायलबीच “पूर्ण युद्धविराम” को घोषणा गरेको केही घण्टापछि भएको हो। तर, इरान र इजरायल दुवैले युद्धविरामको पुष्टि नगरेको अवस्थामा कतारमा भएको आक्रमणले मध्यपूर्वको तनाव थप जटिल बनेको छ। विश्लेषकहरूले यो आक्रमणले क्षेत्रीय शान्ति प्रक्रियालाई असर पार्न सक्ने चेतावनी दिएका छन्।
