काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले नेपाललाई धर्मनिरपेक्ष राष्ट्र बनाउने निर्णय राजनीतिक दलहरूले आम नागरिकको इच्छाविपरीत विदेशी शक्तिको हस्तक्षेप र दबाबमा गरेको आरोप लगाएका छन् ।
आइतबार नेपाल सनातन धर्म संस्कृति संगठनको दोस्रो केन्द्रीय महाधिवेशन उद्घाटन सत्रलाई सम्बोधन गर्दै उनले राजनीतिक दलहरूले धर्मलाई राजनीतिसँग जोडेर आफ्नो स्वार्थ पूरा गर्ने काम गरेको आरोप लगाए । नेपाललाई हिन्दु राष्ट्र बनाउनुपर्ने राप्रपाको माग राजनीतिक नभएको उनको जिकिर थियो ।
हिन्दु राष्ट्रको मागलाई राजनीतिक विषय मान्ने हो भने सनातन धर्मावलम्बीहरू पनि राजनीतिमा आउनुपर्ने उनले बताए । हिन्दु धर्ममाथिको हस्तक्षेप र धर्मनिरपेक्ष राष्ट्र बनाउने निर्णयमा राजनीतिक दलहरू नै जिम्मेवार रहेको उनको आरोप थियो ।
लिङ्देनले हिन्दु धर्म नेपालको स्वाभिमान र अस्तित्वसँग जोडिएको उल्लेख गर्दै यसको संरक्षण हुन नसके देशकै अस्तित्व संकटमा पर्न सक्ने धारणा राखे । नेपालको विविध संस्कृति र परम्परालाई सनातन हिन्दु धर्मले मात्रै एकता र सहिष्णुताको मार्गमा डोर्याउन सक्ने उनको तर्क थियो ।