गौर । रौतहटको सदरमुकाम गौरमा अज्ञात समूहले एक युवकलाई लक्षित गरी पाँच राउन्ड गोली प्रहार गरेको छ। गोली लागेर गौर नगरपालिका–४ गढवाका रामविलास यादवका छोरा राकेश कुमार यादव गम्भीर घाइते भएका छन्।
स्थानीयका अनुसार मंगलबार राति करिब ९ः१५ बजे गढवा गाउँस्थित पानी ट्यांकी नजिकै रहेका यादवमाथि अज्ञात व्यक्तिले एक्कासि पाँच राउन्ड गोली प्रहार गरेका थिए। गोली प्रहार भएपछि घटनास्थलमा त्रास फैलिएको थियो। स्थानीयले घाइते यादवलाई तत्काल उपचारका लागि अस्पताल पुर्याएका थिए।
जिल्ला प्रहरी कार्यालय रौतहटका प्रवक्ता एवं डीएसपी वसन्त गौतमका अनुसार गम्भीर घाइते यादवको वीरगञ्जस्थित बयोधा अस्पतालमा उपचार भइरहेको छ।
चिकित्सकले गरेको सिटी स्क्यानका क्रममा यादवको पिठ्युँमा दुई र हातमा एक गरी तीनवटा गोली लागेको पुष्टि भएको डीएसपी गौतमले बताए। उनका अनुसार घाइतेको हात, पाखुरा र पिठ्युँलगायतका भागमा गोलीका घाउ देखिएका छन्।
घाइतेको अवस्था गम्भीर रहे पनि उनी चिकित्सकसँग कुराकानी गर्न सक्ने अवस्थामा रहेको प्रहरीले जनाएको छ।
यादवमाथि गोली प्रहार गर्ने व्यक्ति को हुन् र घटनाको कारण के हो भन्नेबारे हालसम्म खुल्न सकेको छैन। घटनाको जानकारी पाएलगत्तै जिल्ला प्रहरी कार्यालय रौतहटबाट प्रहरी टोली घटनास्थल पुगेको थियो।
प्रहरीले घटनास्थलको मुचुल्का तथा अनुसन्धान प्रक्रिया अघि बढाउँदै सम्भावित आक्रमणकारीको खोजी गरिरहेको डीएसपी गौतमले जानकारी दिए।
सदरमुकाम गौरकै बस्तीमा रातिको समयमा भएको गोलीकाण्डले स्थानीय बासिन्दामा त्रास र सुरक्षा चिन्ता बढाएको छ। घटनामा संलग्न व्यक्तिको पहिचान तथा गोली प्रहारको कारण पत्ता लगाउन प्रहरीले थप अनुसन्धान गरिरहेको जनाएको छ।
