काठमाडौं । नेकपा (एमाले)का नेता एवं पूर्वपरराष्ट्रमन्त्री प्रदीप ज्ञवालीले नेपालले स्वतन्त्र, सन्तुलित र विश्वासमा आधारित परराष्ट्र नीति अवलम्बन गर्नुपर्ने बताएका छन् । नेपालको व्यवहार र परराष्ट्र नीतिका कारण छिमेकी मुलुकहरूमा अविश्वास पैदा हुने अवस्था आउन दिन नहुने उनको भनाइ छ ।
काठमाडौंमा फ्रेन्ड्स अफ सिल्क रोड क्लब नेपाल र नेपाल–चाइना फ्रेन्डसिप फोरमले आयोजना गरेको एक कार्यक्रममा बोल्दै ज्ञवालीले नेपालको भौगोलिक अवस्थित र ऐतिहासिक पृष्ठभूमिलाई ध्यानमा राखेर परराष्ट्र सम्बन्ध सञ्चालन गर्नुपर्ने बताए । कुनै पनि शक्ति राष्ट्रको रणनीतिक समूहमा आबद्ध नभई असंलग्नता र पञ्चशीलको सिद्धान्तअनुसार अघि बढ्नुपर्नेमा उनले जोड दिए ।
गौतम बुद्धको मध्यम मार्गले समेत नेपालको परराष्ट्र नीतिलाई प्रभावित पारेको उल्लेख गर्दै उनले कुनै पनि अतिवादी धार वा रणनीतिक कित्तामा नलागी सबैसँग सन्तुलित सम्बन्ध कायम गर्नुपर्ने बताए ।
छिमेकी मुलुकहरूको विश्वास गुमे शक्ति राष्ट्रहरूले आफ्नो स्वार्थअनुसार चलखेल गर्ने अवस्था आउन सक्ने उनको चेतावनी थियो । ‘हाम्रा कुनै पनि व्यवहारले छिमेकीहरू झस्किने र हामीप्रति अविश्वास बढ्ने खालको नीति नेपालले अवलम्बन गर्नुहुँदैन,’ उनले भने, ‘कुनै पनि छिमेकीप्रति अविश्वास बढ्ने स्थिति सिर्जना भयो भने नेपालले थेग्न नसक्ने दबाब आइलाग्छ भन्ने कुरालाई हामीले सधैं हेक्का राख्नुपर्छ ।’
ज्ञवालीले चीन र भारत दुवै छिमेकीसँगको सम्बन्धलाई अवसरका रूपमा लिनुपर्ने बताए । चीन विश्वको दोस्रो ठूलो अर्थतन्त्र, ठूलो उपभोक्ता बजार, नवप्रवर्तनको केन्द्र तथा उत्पादन र आर्थिक वृद्धिको इन्जिन रहेको उल्लेख गर्दै उनले दक्षिणी छिमेकी भारत पनि उत्तिकै महत्त्वपूर्ण रहेको बताए ।
नेपाल ठूला मुलुकको बीचमा रहेको अवस्थालाई कमजोरी वा हीनताबोधका रूपमा नभई अवसरका रूपमा लिनुपर्ने उनको भनाइ थियो । दुवै छिमेकीसँग पारदर्शी, विश्वसनीय र सन्तुलित सम्बन्ध कायम गर्न सके उनीहरूको विश्वास जित्न सकिने उनले बताए ।
ज्ञवालीले चीनको कम्युनिस्ट पार्टी संगठनात्मक र नीतिगत रूपमा व्यवस्थित रहेको उल्लेख गर्दै त्यसबाट नेपाली कम्युनिस्ट पार्टीहरूले समेत पाठ सिक्नुपर्ने बताए ।
