काठमाडौं । चर्चित टिकटककर्मी तुलसा अधिकारी (तुलसा कलेक्सन) थुनामुक्त हुन असफल भएकी छन् । आपराधिक लाभ, संगठित अपराध तथा सम्पत्ति शुद्धीकरणसम्बन्धी मुद्दामा पुर्पक्षका लागि थुनामा राख्ने जिल्ला अदालत ललितपुरको आदेशलाई उच्च अदालत पाटनले सदर गरेको छ ।
जिल्ला अदालत ललितपुरले पुर्पक्षका लागि थुनामा पठाउने गरी गरेको आदेशविरुद्ध अधिकारीले उच्च अदालत पाटनमा पुनरावेदन गरेकी थिइन् । उक्त निवेदनमाथि सुनुवाइ गर्दै न्यायाधीशद्वय खड्कबहादुर केसी र केशवप्रसाद अधिकारीको संयुक्त इजलासले जिल्ला अदालतको आदेश बेरितको नदेखिएको ठहर गरेको हो ।
अधिकारीविरुद्ध २१ करोड १२ लाख २० हजार ४०६ रुपैयाँ १६ पैसा बिगो मागदाबी गरिएको छ । उनीमाथि संगठित अपराध निवारण ऐन, २०७० को दफा ३ र ८ अनुसार आपराधिक लाभ (एक्सटर्सन) लिएको, हुन्डीमार्फत आर्जित सम्पत्तिको स्रोत तथा स्थान परिवर्तन गरेको र सम्पत्ति शुद्धीकरण निवारण ऐन, २०६४ विपरीत कसुर गरेको अभियोग लगाइएको छ ।
अभियोगपत्रमा पीडितलाई क्षतिपूर्तिसहित कानुनबमोजिम सजाय गर्न माग गरिएको छ ।
उच्च अदालतले अधिकारीलाई तत्काल प्राप्त प्रमाणका आधारमा पुर्पक्षका लागि थुनामै राख्नुपर्ने विभिन्न आधारसमेत औँल्याएको छ । आदेशमा जाहेरवाला कुमार चामोरियाको जाहेरी तथा थप निवेदन, विना कुमारी चामोरिया, नवराज आचार्य, रुद्रप्रसाद आचार्य, हेमराज रसाइली र नितु गुसाललगायतले गरिदिएको कागज तथा प्रहरी प्रतिवेदनलाई आधार मानिएको छ ।
त्यसैगरी, अधिकारीले अदालतसमक्ष दिएको बयानमा जाहेरवालासँग सम्बन्ध रहेको स्वीकार गरेको र आफ्नो नाममा रहेको ‘तुलसा कलेक्सन प्रालि’ ले सरकारी निकायमा पेस गरेको आय–व्यय विवरणमा वास्तविकभन्दा कम कारोबार देखाइएको विषयमा आफ्नो कमजोरी रहेको उल्लेख गरेको तथ्यलाई पनि अदालतले विचार गरेको छ ।
मिसिलमा संलग्न तत्काल प्राप्त प्रमाणका आधारमा पछि थप प्रमाण बुझ्दै जाँदा ठहरेबमोजिम हुने गरी जिल्ला अदालत ललितपुरले २०८१ जेठ २१ मा गरेको थुनासम्बन्धी आदेश कानुनसम्मत देखिएको उच्च अदालतको ठहर छ ।
उच्च अदालतको आदेशसँगै अधिकारीले मुद्दाको अन्तिम फैसला नआएसम्म पुर्पक्षका लागि थुनामै रहेर मुद्दाको सामना गर्नुपर्ने भएको छ ।
