काठमाडौं । भारतको आन्ध्र प्रदेश र विशाखापट्टनम आसपासको तटीय क्षेत्रमा प्रवेश गर्ने अनुमान गरिएको शक्तिशाली चक्रवाती आँधी ‘अर्नब’ को सम्भावित प्रभावलाई ध्यानमा राख्दै नेपाल नागरिक उड्डयन प्राधिकरण (क्यान) ले हवाई सुरक्षामा उच्च सतर्कता अपनाउन निर्देशन दिएको छ ।
प्राधिकरणले बुधबार (कात्तिक ११) सुरक्षा परिपत्र जारी गर्दै हवाई सेवा प्रदायक, विमानस्थल सञ्चालक, वायुसेवा कम्पनी तथा सम्बन्धित निकायलाई आवश्यक सुरक्षा सतर्कता अपनाउन आग्रह गरेको हो ।
जल तथा मौसम विज्ञान विभागको मौसम पूर्वानुमान महाशाखाका अनुसार उक्त मौसमी प्रणालीको प्रभावले नेपालका विभिन्न क्षेत्रमा मध्यमदेखि भारी वर्षा, चट्याङसहितको हुरीबतास र तीव्र हावाहुरी चल्न सक्ने सम्भावना छ । हिमाली तथा उच्च पहाडी क्षेत्रमा हिमपातसमेत हुन सक्ने अनुमान गरिएको छ ।
यसको प्रभाव विशेषगरी कोशी, मधेश, बागमती, गण्डकी र लुम्बिनी प्रदेशमा पर्ने सम्भावना रहेको छ । कर्णाली र सुदूरपश्चिम प्रदेशका केही क्षेत्रमा समेत मौसम प्रभावित हुन सक्ने जनाइएको छ ।
कात्तिक १२ देखि १४ गतेसम्म भारी वर्षा, तीव्र हावाहुरी र दृश्यता कम हुन सक्ने भएकाले हवाई उडान तथा अवतरण, विमानस्थल सञ्चालन र धावनमार्गको अवस्थासमेत प्रभावित हुन सक्ने प्राधिकरणले जनाएको छ ।
प्रतिकूल मौसममा हवाई ट्राफिक व्यवस्थापन गर्ने निकायलाई उडान सञ्चालनको उचित योजना बनाउन र आवश्यकताअनुसार अन्य हवाई सेवा इकाइसँग समन्वय गर्न निर्देशन दिइएको छ । मौसम निर्धारित सुरक्षा सीमाभन्दा प्रतिकूल भएमा उडान मार्ग परिवर्तन गर्ने, विमानलाई आकाशमै प्रतीक्षा गराउने (होल्डिङ) लगायतका आवश्यक उपाय अपनाउन पनि भनिएको छ ।
त्यस्तै, राडार नियन्त्रकलाई विमानबीच आवश्यक दूरी कायम गर्न तथा हावाको गति र दिशामा अचानक परिवर्तन हुने अवस्था (विन्ड सियर), वायुमण्डलीय अस्थिरता र चट्याङयुक्त हुरीबतासबारे उडान तथा अवतरण गरिरहेका विमानलाई तत्काल जानकारी गराउन परिपत्रमा उल्लेख छ ।
वर्षाका कारण धावनमार्गमा पानी जम्ने, सतह चिप्लिने र विमानको ब्रेकिङ क्षमतामा असर पर्न सक्ने जोखिमलाई ध्यानमा राख्दै नियमित निरीक्षण गर्न पनि प्राधिकरणले निर्देशन दिएको छ । विमानस्थल सञ्चालन, सिभिल इन्जिनियरिङ तथा एयरसाइड विभागबीच निरन्तर समन्वय कायम राख्न, हावाले उडाएर ल्याएका वस्तु तथा फोहोर हटाउन र विमानस्थलका बत्ती तथा अन्य अत्यावश्यक प्रणाली सञ्चालनमा रहेको सुनिश्चित गर्न भनिएको छ ।
कुनै उपकरण वा प्रणालीमा समस्या आएमा त्यसबारे तत्काल आवश्यक सूचना जारी गर्नसमेत प्राधिकरणले निर्देशन दिएको छ ।
वायुसेवा सञ्चालक तथा उडान चालक दललाई उडानअघि मौसमको विस्तृत मूल्याङ्कन गर्न, सम्भावित ढिलाइ, होल्डिङ र वैकल्पिक विमानस्थलमा अवतरण गर्नुपर्ने अवस्थालाई ध्यानमा राख्न आग्रह गरिएको छ । पर्याप्त इन्धनको व्यवस्था गर्न र निर्धारित हवाई सुरक्षा प्रक्रियाको पूर्ण पालना गर्न पनि परिपत्रमा जोड दिइएको छ ।
यसैगरी, हवाई मार्ग सेवा तथा हवाई ट्राफिक व्यवस्थापनका अत्यावश्यक पूर्वाधार, वैकल्पिक विद्युत् आपूर्ति र सञ्चार प्रणालीलाई तयारी अवस्थामा राख्न सम्बन्धित निकायलाई निर्देशन दिइएको छ । कुनै गम्भीर जोखिम, अवरोध वा सुरक्षा घटना भएमा निर्धारित माध्यमबाट तत्काल जानकारी गराउनसमेत प्राधिकरणले आग्रह गरेको छ ।
