सुर्खेत । अर्नव चक्रवात र पश्चिमी वायुको प्रभावले कर्णाली प्रदेशका हिमाली जिल्लासहित देशका विभिन्न क्षेत्रमा वर्षा तथा हिमपात हुने सम्भावना रहेकाले सतर्कता अपनाउन आग्रह गरिएको छ।
मौसम–जलवायु विज्ञान कार्यालय सुर्खेतले बिहीबारदेखि कात्तिक १४ गतेसम्म मौसम प्रभावित हुन सक्ने भन्दै सर्वसाधारणलाई सावधानी अपनाउन अनुरोध गरेको हो।
कार्यालयका अनुसार बिहीबार कर्णाली प्रदेशका सुर्खेत, सल्यान, दैलेख र रुकुम पश्चिमबाहेकका जिल्लामा मौसमको प्रभाव पर्ने सम्भावना छ। शुक्रबार र शनिबार भने देशका विभिन्न भूभागमा वर्षा तथा हिमपात हुन सक्ने पूर्वानुमान गरिएको छ।
सम्भावित मौसम परिवर्तनलाई ध्यानमा राख्दै हुम्ला, मुगु, डोल्पा, जुम्ला, कालीकोट, जाजरकोट र दैलेखलगायत जिल्लाका बासिन्दालाई विशेष सतर्कता अपनाउन आग्रह गरिएको छ। साथै, मौसमसम्बन्धी अद्यावधिक सूचना नियमित रूपमा लिन कार्यालयले अनुरोध गरेको छ।
पहिरो, बाढी र हिमपहिरोको जोखिम
सम्भावित वर्षाका कारण पहिरो, बाढी तथा लेदो र गेग्रानसहितको बहावको जोखिम बढ्न सक्ने जनाइएको छ। हिमाली क्षेत्रमा हिमआँधी र हिमपहिरोको जोखिमसमेत रहेकाले आवश्यक सावधानी अपनाउन आग्रह गरिएको छ।
सम्भव भएसम्म हिमाली क्षेत्रमा यात्रा नगर्न र यात्रा गर्नैपर्ने अवस्था भए मौसमको अवस्था बुझेर मात्र निस्कन अनुरोध गरिएको छ। विशेषगरी हिमाली तथा पहाडी क्षेत्रका जोखिमयुक्त सडक र पदमार्गमा यात्रा गर्नेले मौसम पूर्वानुमानलाई ध्यान दिनुपर्नेछ।
धानबाली भित्र्याउँदा सावधानी अपनाउन आग्रह
धानबाली भित्र्याउने समय चलिरहेकाले किसानलाई पनि मौसमको पूर्वानुमान हेरेर मात्र धान काट्ने तथा भित्र्याउने काम गर्न आग्रह गरिएको छ।
सम्भावित वर्षाका कारण काटेर खेतमै राखिएको धान भिज्ने र बालीमा क्षति पुग्ने जोखिम रहेकाले किसानले समयमै कटानी तथा सुरक्षित भण्डारणको व्यवस्था मिलाउनुपर्ने देखिन्छ।
जिल्ला प्रशासनद्वारा पनि सतर्क रहन आग्रह
सम्भावित मौसमी जोखिमलाई मध्यनजर गर्दै कर्णालीका हिमाली तथा पहाडी जिल्लाका प्रमुख जिल्ला अधिकारीहरूले सूचना जारी गरी सर्वसाधारणलाई सचेत रहन र सावधानीपूर्वक यात्रा गर्न आग्रह गरेका छन्।
डोल्पाका प्रमुख जिल्ला अधिकारी जुनु हमालले मौसमको अवस्थालाई ध्यानमा राखेर सावधानीपूर्वक यात्रा गर्न अनुरोध गरिएको बताइन्।
त्यस्तै, जिल्ला प्रशासन कार्यालय हुम्लाले पनि सूचना जारी गर्दै मौसमको पूर्वानुमान हेरेर मात्र यात्रामा निस्कन आग्रह गरेको छ।
सम्भावित मौसमी विपद्बाट जोगिन स्थानीय बासिन्दा, किसान तथा यात्रुले आधिकारिक मौसम पूर्वानुमान नियमित रूपमा हेर्न र जोखिमयुक्त क्षेत्रबाट टाढा रहन आवश्यक छ।
