काठमाडौँ। दसैँका अवसरमा नेपाल प्रहरी र सशस्त्र प्रहरी बलले सञ्चालन गरेको निःशुल्क बस सेवाबाट काठमाडौँ उपत्यकामा ३ हजार ५८५ यात्रु लाभान्वित भएका छन्।
प्रहरी प्रधान कार्यालयका अनुसार नेपाल प्रहरीले तीनवटा सवारीसाधनमार्फत कात्तिक ३ र ४ गते क्रमशः ५१० र ८९६ गरी १ हजार ४०६ यात्रुलाई निःशुल्क सेवा दिएको थियो।
त्यस्तै, सशस्त्र प्रहरी बलले सञ्चालन गरेका दुईवटा बसबाट अष्टमी, नवमी र दशमीका दिन २ हजार १७९ यात्रुले सेवा लिएको सशस्त्र प्रहरीका सहप्रवक्ता शैलेन्द्र थापाले जानकारी दिए।
दसैँका बेला सार्वजनिक सवारीसाधनको अभावमा यात्रुलाई आवागमनमा सहजता प्रदान गर्न दुवै सुरक्षा निकायले निःशुल्क बस सेवा सञ्चालन गरेका थिए।
