ललितपुर । पूर्वअर्थमन्त्री सुरेन्द्र पाण्डेले पटकपटक राजनीतिक परिवर्तन भए पनि नेपालमा अपेक्षित आर्थिक तथा सामाजिक रूपान्तरण हुन नसकेको बताएका छन् ।
ललितपुरको पुल्चोकमा ‘नागरिक आवाज अभियान’ घोषणा कार्यक्रममा बोल्दै पाण्डेले २००७ सालदेखि भएका राजनीतिक परिवर्तनले आर्थिक रूपान्तरणको अपेक्षा पूरा गर्न नसकेको बताए । जेन–जी आन्दोलनको एक वर्ष बितिसक्दा पनि भ्रष्टाचार अन्त्य र स्वदेशमै रोजगारीको मागअनुसार सुधार हुन नसकेको उनको भनाइ छ ।
पाण्डेका अनुसार गत वर्ष साउनमा ६८ हजारले वैदेशिक रोजगारीका लागि अनुमति लिएकोमा यस वर्ष सोही अवधिमा ७० हजार पुगेका छन् ।
‘२००७ सालदेखि आजसम्म ७६ वर्षको अन्तरालमा अनेक पटक राजनीतिक परिवर्तन भए तर हाम्रो मुलुकले खोजेको राजनीतिकसँगसँगै आर्थिक रूपान्तरण भएन,’ उनले भने ।
नागरिकका मुद्दालाई प्राथमिकतामा राखेर अभियानलाई साझा मञ्चका रूपमा अघि बढाउने बताउँदै पाण्डेले यसलाई राजनीतिक विकल्पका रूपमा अघि नबढाइने स्पष्ट पारे । सरकारका कामकारबाहीको निगरानी गर्दै नागरिकका सुझावका आधारमा अभियानलाई अघि बढाउने उनको भनाइ छ ।
