काठमाडौँ । नेपाल क्रिकेट सङ्घ (क्यान) ले आगामी दुई ठूला प्रतियोगिता—आइसिसी यु–१९ महिला विश्वकप र नेपाल प्रिमियर लिग (एनपिएल) को तेस्रो संस्करणका लागि तयारी तीव्र पारेको छ।
नेपालले पहिलोपटक आयोजना गर्न लागेको आइसिसी यु–१९ महिला विश्वकप आगामी पुसमा हुँदैछ भने एनपिएलको तेस्रो संस्करण कात्तिकदेखि सञ्चालन गर्ने तालिका छ। दुवै प्रतियोगितालाई लक्षित गर्दै कीर्तिपुरस्थित त्रिभुवन विश्वविद्यालय (टियु) क्रिकेट मैदान र मूलपानी क्रिकेट मैदानको स्तरोन्नति तथा आवश्यक पूर्वाधार निर्माणलाई तीव्रता दिइएको क्यानका उपाध्यक्ष रोशनबहादुर सिंहले जानकारी दिए।
उनका अनुसार आगामी अन्तर्राष्ट्रिय प्रतियोगितालाई व्यवस्थित रूपमा सञ्चालन गर्न मैदानमा आवश्यक संरचना थप्ने र व्यवस्थापन सुधार्ने काम भइरहेको छ। विशेषगरी एनपिएलका अघिल्ला दुई संस्करणमा देखिएका दर्शक व्यवस्थापन तथा अन्य कमजोरीलाई यसपटक सुधार गर्ने तयारी गरिएको छ।
“विगतमा जुन–जुन ठाउँमा त्रुटि भएको थियो, त्यसलाई यसपटक सच्याउने प्रयास गर्नेछौँ। दर्शकलाई सुविधा दिने प्रयास गर्नेछौँ, किनकि उहाँहरूले पैसा तिरेर खेल हेर्नुहुन्छ,” सिंहले भने।
दर्शकको सहजताका लागि पार्किङ, बाइक स्ट्यान्डलगायतका व्यवस्थापनलाई व्यवस्थित बनाउने तयारी भइरहेको उनले बताए। दर्शकलाई हुने असहजता पहिचान गरी त्यसअनुसार सुधारका काम अघि बढाइएको उनको भनाइ छ।
सिंहले एनपिएलका पहिलो र दोस्रो संस्करणमा देखिएका कमजोरी दोहोरिन नदिन मैदान तथा समग्र व्यवस्थापनमा विशेष ध्यान दिइएको बताए।
नेपालले पहिलोपटक आयोजना गर्न लागेको यु–१९ महिला विश्वकपका खेल टियु र मूलपानी क्रिकेट मैदानमा सञ्चालन हुनेछन्। मूलपानीको तुलनामा टियु मैदानमा बढी खेल आयोजना हुने उनले जानकारी दिए।
विश्वकपलाई लक्षित गर्दै मैदानमा प्यारापिट, टोलीका लागि विश्रामस्थल तथा अन्तर्राष्ट्रिय क्रिकेट परिषद् (आइसिसी), एसियाली क्रिकेट परिषद् (एसिसी) र खेलाडीका अभिभावकका लागि आवश्यक भिआइपी संरचना निर्माण भइरहेको छ।
मूलपानी क्रिकेट मैदान लामो समयदेखि निर्माण तथा स्तरोन्नतिको क्रममा रहे पनि अझै पूर्ण रूपमा तयार हुन नसकेको भन्दै सिंहले सरकारको ध्यानाकर्षण गराए। उनले मैदान निर्माणमा भइरहेको ढिलाइ अन्त्य गरी कामलाई तीव्रता दिनुपर्नेमा जोड दिए।
“क्रिकेटले देशलाई अन्तर्राष्ट्रिय रूपमा चिनाएको छ । क्रिकेटले एउटा खुसी दिएको छ,” उनले भने।
सिंहले मूलपानी मैदानको निर्माण छिटो सम्पन्न गर्न सरकारसँग आग्रह गर्दै नेपालमा अन्तर्राष्ट्रियस्तरका थप क्रिकेट मैदान निर्माण गर्नुपर्ने बताए। उनका अनुसार कम्तीमा दुईवटा ठूला क्षमताका अन्तर्राष्ट्रिय क्रिकेट मैदान तयार भएमा नेपालले भविष्यमा विश्वकप, एसिसी प्रिमियर कप, एसिया कप तथा विश्वकप छनोटजस्ता ठूला प्रतियोगिता आयोजना गर्न सक्नेछ।
“चाँडोभन्दा चाँडो मैदान निर्माण गरेर अन्तर्राष्ट्रिय जगत्मा नेपालमा पनि कम्तीमा दुईवटा ठूला ग्राउन्ड भएको देखाउनुपर्छ,” सिंहले भने।
नेपालमा भारत र पाकिस्तानलगायतका टोली सहभागी हुने ठूला प्रतियोगिता आयोजना गर्न सके त्यसबाट आर्थिक गतिविधिमा समेत योगदान पुग्ने उनको भनाइ छ।
ठूला अन्तर्राष्ट्रिय प्रतियोगिता आयोजना गर्न आवश्यक पूर्वाधार निर्माणमा सरकार, स्थानीय तह र सम्बन्धित निकायबीच सहकार्य आवश्यक रहेको सिंहले बताए। मूलपानी क्रिकेट मैदानको निर्माण सम्पन्न भएपछि नेपालको क्रिकेट पूर्वाधार थप बलियो हुने क्यानको विश्वास छ।
