रौतहट । रौतहटमा १९ वर्षअघि भएको दुई युवाको हत्या प्रकरणमा अपहरण, शरीर बन्धक तथा सङ्गठित अपराधका मुद्दामा दोषी ठहर भई जिल्ला कारागार रौतहटमा सजाय भोगिरहेका ‘बारुद सिंह’ भनिने सुरेन्द्रप्रसाद यादवको संलग्नता देखिएको प्रहरीले जनाएको छ।
गरुडा नगरपालिका–७ का ३२ वर्षीय नागेन्द्र बैठा र वडा नं. २ का २८ वर्षीय प्रमानन्द सहनीको २०६४ साल वैशाख ३१ गते राति गढीमाई नगरपालिका–६ पिपरिया दोसतियामा गोली हानी हत्या भएको थियो।
जिल्ला प्रहरी कार्यालय रौतहटका सूचना अधिकारी एवं प्रहरी नायब उपरीक्षक वसन्त गौतमका अनुसार उक्त घटनाको अनुसन्धानका क्रममा तत्कालीन समयमा तराई जनतान्त्रिक मुक्ति मोर्चालगायत भूमिगत संगठनमा आबद्ध यादव मुख्य अभियुक्तका रूपमा देखिएका हुन्।
अज्ञात व्यक्ति वा समूहले गोली चलाउँदा बैठा र सहनीको मृत्यु भएको घटनाको लामो समयपछि प्रहरीले अनुसन्धान अघि बढाएको हो। अनुसन्धानपछि यादवलाई कर्तव्य ज्यान मुद्दाको मुख्य अभियुक्तका रूपमा पहिचान गरिएको र घटनाबारे थप अनुसन्धान भइरहेको प्रहरीले जनाएको छ।
यसैबीच, बाराको सिम्रौनगढ नगरपालिका–११ कटहरिया टोलका २७ वर्षीय सचिन्द्र यादव रौतहटको मौलापुर नगरपालिका–४ स्थित लालबकैया पुलबाट खोलामा हामफालेर बेपत्ता भएका छन्।
प्रहरीका अनुसार मानसिक समस्याबाट पीडित यादव उपचारका लागि गरुडातर्फ जाँदै गर्दा मोटरसाइकलबाट ओर्लिएर शुक्रबार दिउँसो करिब १ बजे पुलबाट खोलामा हामफालेका थिए।
घटनाको जानकारी पाएलगत्तै नेपाल प्रहरी, सशस्त्र प्रहरी बल र स्थानीयवासीले खोजी तथा उद्धार सुरु गरेका छन्। गोताखोरसहित सशस्त्र प्रहरीको टोलीसमेत खोजीमा परिचालन गरिएको छ।
लालबकैया खोलामा पानीको बहाव बढेका कारण खोज तथा उद्धारमा कठिनाइ भइरहेको प्रहरीले जनाएको छ। घटनास्थल इलाका प्रहरी कार्यालय मौलापुरबाट करिब तीन किलोमिटर पूर्वमा पर्छ।
