काठमाडौं । एक्स्ट्रिम इनर्जी ड्रिंक्सको सहकार्यमा नेपाल भलिबल लिग (एनभीएल) को पहिलो संस्करणको च्याम्पियन अन्नपूर्ण स्पाइकर्स किंग्सले ऐतिहासिक उपाधिको उत्सव मनाउँदै ‘एक्स्ट्रिम गौरवको यात्रा – ‘च्याम्पियन्स अफ नेपाल भलिबल लिग ट्रफी टुर’ सम्पन्न गरेको छ ।
नेपाली भलिबलको ऐतिहासिक सफलतालाई देशका विभिन्न स्थानका समर्थक र खेलप्रेमीमाझ पुर्याउने उद्देश्यले आयोजित ट्रफी टुरअन्तर्गत च्याम्पियन ट्रफी गण्डकी प्रदेशका विभिन्न प्रमुख सहर तथा स्थानमा प्रदर्शन गरिएको थियो । अन्नपूर्ण स्पाइकर्स किंग्सले ट्रफीसहित आधार शिविरसम्म पुगेर ट्रफी टुर सम्पन्न गरेको हो ।
एक्स्ट्रिम इनर्जी ड्रिंक्सको सहकार्यमा आयोजित अभियानमार्फत नेपाली भलिबलप्रतिको उत्साह, खेलाडीको उपलब्धि र खेल संस्कृतिलाई समर्थकमाझ जोड्ने प्रयास गरिएको आयोजकले जनाएको छ । ट्रफीलाई खेलाडी, समर्थक तथा स्थानीय समुदायसँग प्रत्यक्ष जोड्ने उद्देश्यले विभिन्न स्थानमा विशेष कार्यक्रम तथा भेटघाटसमेत गरिएको थियो ।
नेपाल भलिबल लिग नेपालको पहिलो व्यावसायिक पुरुष फ्रेन्चाइज भलिबल लिग हो । पहिलो संस्करण काठमाडौंको त्रिपुरेश्वरस्थित राष्ट्रिय खेलकुद परिषद्को कभर्ड हलमा भदौ १९ देखि २७ गतेसम्म सञ्चालन भएको थियो । प्रतियोगितामा अन्नपूर्ण स्पाइकर्स किंग्ससहित काठमाडौं रेड्स, कर्णाली शिवराज, खप्तड फाल्कन्स, मधेश वारियर्स र सगरमाथा स्म्यासर्स गरी ६ टोलीले प्रतिस्पर्धा गरेका थिए ।
ऐतिहासिक फाइनलमा अन्नपूर्ण स्पाइकर्स किंग्सले कर्णाली शिवराजलाई ३–० को सोझो सेटमा पराजित गर्दै एनभीएलको पहिलो संस्करणको च्याम्पियन बनेको थियो । अन्नपूर्णले फाइनलमा २५–१५, २५–२० र २५–१८ को सेटमा जित हात पारेको थियो ।
च्याम्पियन बनेसँगै अन्नपूर्णले २० लाख रुपैयाँ नगद पुरस्कारसहित पहिलो एनभीएल उपाधि हात पारेको थियो ।
