नागोया । वरिष्ठ खेल पत्रकार नवीन अर्यालको पुस्तक ‘नेपाल–जापान खेल सम्बन्ध’ जापानको नागोयामा विमोचन भएको छ।
दियालो रेस्टुरेन्टमा आयोजित समारोहमा जापानका लागि नेपाली कार्यवाहक राजदूत हरिहरकान्त पौडेलले पुस्तक विमोचन गरे। कार्यक्रममा गैरआवासीय नेपाली संघ (एनआरएनए)का वरिष्ठ उपाध्यक्ष रोविनप्रसाद गौचन, नेपाल सफ्ट टेनिस संघका अध्यक्ष तथा अन्तर्राष्ट्रिय सफ्ट टेनिस संघका मानार्थ अध्यक्ष विनयविक्रम शाह, पूर्वकराते खेलाडी देव घिमिरे, आईएसकेएका विश्व च्याम्पियन अविरल घिमिरे, मोना आईसीसी उपाध्यक्ष दीपक केसी, एनआरएनए जापानका महासचिव श्याम शितल श्रेष्ठ र एनआरएनए जापान नागोया क्षेत्रीय समितिका संयोजक योमन देवानलगायत उपस्थित थिए।
पुस्तकबारे धारणा राख्दै कार्यवाहक राजदूत पौडेलले पुस्तकले नेपाल–जापानबीचको खेल सम्बन्ध बुझ्न महत्वपूर्ण आधार प्रदान गर्ने बताए। ‘जापानसँग हाम्रो कूटनीतिक सम्बन्ध स्थापना हुनुभन्दा पाँच वर्ष अगाडि नै खेलमार्फत हामी जोडिसकेका थियौं भन्ने जानकारी यही पुस्तकबाट थाहा पाएँ,’ उनले भने।
उनले पुस्तक नेपाल–जापान सम्बन्धका लागि महत्त्वपूर्ण दस्तावेज बन्ने विश्वास व्यक्त गरे।
एनआरएनएका वरिष्ठ उपाध्यक्ष गौचनले पुस्तकले दुई देशबीचको मित्रता र सम्बन्धलाई खेलकुदको माध्यमबाट उजागर गरेको बताए। जापानमा रहेका नेपालीलाई नेपाल–जापानको खेल सम्बन्धबारे जानकारी गराउने महत्वपूर्ण प्रयासका लागि उनले लेखक अर्याललाई धन्यवाद दिए।
अर्यालले पुस्तकमा नेपाल र जापानबीच सात दशकभन्दा लामो खेल सम्बन्धका विभिन्न पक्ष समेटेका छन्। उनका अनुसार दुई देशबीच कूटनीतिक सम्बन्ध स्थापना हुनुअघि नै खेलकुदका माध्यमबाट सम्बन्ध जोडिएको ऐतिहासिक तथ्य पुस्तकमा समेटिएको छ।
कार्यक्रममा गलकोट समाज जापानका उपाध्यक्ष भेषनाथ गौतम, व्यवसायी डिलाराम खरेल, एनआरएनए जापान नागोया क्षेत्रीय समितिका पूर्वउपसंयोजक नवराज चापागाईं, उपसंयोजक यामबहादुर पाइजा मगर, स्थानीय पत्रकार कविकिरण न्यौपाने र निसान राणालगायतको उपस्थिति थियो। कार्यक्रम पत्रकार कान्ता गिरीले सञ्चालन गरेकी थिइन्।
