मुस्ताङ — नेपाल–चीन उत्तरी कोरलानाकास्थित लोमान्थाङ–४ न्हेचुङमा रहेको मुस्ताङ भन्सार कार्यालयले पछिल्लो १५ दिनमा १ अर्ब ७८ करोड ४४ लाख रुपैयाँ राजस्व सङ्कलन गरेको छ।
रसुवागढी–केरुङ र तातोपानी नाका अवरुद्ध भएपछि कोरलानाकाबाट चिनियाँ मालवस्तुको आयात बढेसँगै भन्सार राजस्वमा उल्लेख्य वृद्धि भएको हो। मुस्ताङ भन्सार कार्यालयका प्रमुख विदुर चुडालका अनुसार शुक्रबार मात्रै २७ करोड ११ लाख रुपैयाँ राजस्व सङ्कलन भएको छ। उनका अनुसार भदौ २२ गतेदेखि दैनिक औसत ३० करोड रुपैयाँ हाराहारीमा राजस्व उठिरहेको छ।
शुक्रबार मात्रै ७१ वटा कन्टेनर र १०६ वटा विद्युतीय सवारीसाधन (ईभी) को भन्सार जाँचपास गरिएको छ। भदौ १० गतेदेखि २५ गतेसम्म कोरलानाकाबाट ४३४ वटा कन्टेनर र ६४१ वटा ईभी भन्सार जाँचपास भएर नेपाल भित्रिएका छन्।
चालु आर्थिक वर्ष २०८३/८४ को साउनदेखि भदौ २५ गतेसम्म कोरलानाका हुँदै कुल २ अर्ब ३१ करोड ४४ लाख रुपैयाँ राजस्व सङ्कलन भइसकेको भन्सार कार्यालयले जनाएको छ।
यसअघि उपल्लो मुस्ताङका स्थानीयवासीका लागि मात्र सीमित रहेको कोरलानाका नेपाल सरकारले २०८० असोजअघि नै क्रमशः व्यापारिक प्रयोजनतर्फ विस्तार गर्दै गत वर्ष भदौ ३१ गतेदेखि वैकल्पिक निकासी–पैठारी नाकाका रूपमा औपचारिक रूपमा खुला गरेको थियो।
गत आर्थिक वर्ष २०८२/८३ मा मुस्ताङ भन्सार कार्यालयले ६ अर्ब ९२ करोड रुपैयाँ राजस्व सङ्कलन गरेको थियो। पछिल्लो समय अन्य प्रमुख उत्तरी नाका अवरुद्ध हुँदा कोरलानाकाबाट आयात बढेपछि चालु आर्थिक वर्षमा राजस्व सङ्कलन थप बढ्ने देखिएको छ।
