काठमाडौं । एसीसी प्रिमियर कप एकदिवसीय क्रिकेट प्रतियोगिताको तेस्रो संस्करणको उपाधिका लागि आज नेपाल र संयुक्त अरब इमिरेट्स (युएई) आमनेसामने हुँदैछन्।
मलेसियाको क्वालालम्पुरस्थित बायुमास ओभलमा हुने फाइनल खेल बिहान ७ः१५ बजे सुरु हुनेछ। दुवै टोली प्रतियोगिताको दोस्रोपटक उपाधि जित्ने लक्ष्यसहित मैदान उत्रँदैछन्।
प्रतियोगिताको पहिलो संस्करण सन् २०२३ मा नेपालले जितेको थियो। फाइनलमा युएईलाई सात विकेटले पराजित गर्दै नेपाल च्याम्पियन बनेको थियो। त्यसपछि सन् २०२४ मा युएईले आयोजक ओमानलाई हराउँदै उपाधि आफ्नो नाममा गरेको थियो।
यसपटकको फाइनल अझ महत्वपूर्ण बनेको छ, किनकि प्रतियोगिताको विजेता टोलीले मात्र एसिया कपमा स्थान सुरक्षित गर्नेछ। त्यसैले नेपाल र युएई दुवैका लागि आजको खेल उपाधिसँगै एसिया कपको टिकट सुनिश्चित गर्ने निर्णायक अवसरसमेत हो।
जारी प्रतियोगितामा नेपालले समूह चरण र सेमिफाइनलसहित पाँच खेल खेल्दा चार जित र एक हार बेहोरेको छ। युएई भने प्रतियोगिताभर अपराजित रहँदै फाइनलसम्म पुगेको हो।
एकदिवसीय अन्तर्राष्ट्रिय क्रिकेटमा नेपाल र युएईबीच हालसम्म १९ खेल भएका छन्। तीमध्ये नेपालले ११ खेल जित्दा युएईले आठ खेलमा सफलता हात पारेको छ। पछिल्ला पाँच भेटमा नेपाल तीनपटक विजयी भएको छ।
नेपालले युएईसँग पछिल्लोपटक गत मे महिनामा आईसीसी विश्वकप लिग–२ अन्तर्गत प्रतिस्पर्धा गरेको थियो। उक्त सिरिजका दुवै खेलमा नेपालले युएईलाई पराजित गरेको थियो।
अब बायुमास ओभलमा हुने फाइनलमा नेपाल आफ्नो पछिल्लो लयलाई निरन्तरता दिँदै उपाधि जित्ने प्रयासमा हुनेछ भने युएई नेपालमाथि बदला लिँदै दोस्रोपटक च्याम्पियन बन्ने लक्ष्यमा मैदान उत्रनेछ।
