काठमाडौँ । एसियन क्रिकेट काउन्सिल (एसिसी) प्रिमियर कपको तेस्रो संस्करणअन्तर्गत नेपालले आज साउदी अरेबियासँग प्रतिस्पर्धा गर्दैछ। मलेसियामा जारी प्रतियोगिताको समूह ‘ए’ अन्तर्गतको खेल बिहान ७ः१५ बजे सुरु हुनेछ।
नेपालले प्रतियोगिताका सुरुआती दुई खेलमा उत्कृष्ट प्रदर्शन गरेको छ। पहिलो खेलमा बहराइनलाई सात विकेटले तथा दोस्रो खेलमा आयोजक मलेसियालाई छ विकेटले पराजित गर्दै नेपालले लगातार दुई जित निकालेको हो। चार अंक जोडेको नेपाल समूह ‘ए’को दोस्रो स्थानमा छ।
यता साउदी अरेबियाले तीन खेलमा एक जित र दुई हार बेहोरेको छ। दुई अंकसहित ऊ समूहको पुछारमा रहेको छ। त्यसैले नेपाल आजको खेलमा जित निकाल्दै सेमिफाइनलको सम्भावना बलियो बनाउने योजनामा हुनेछ।
सन् २०२७ मा आयोजना हुने एसिया कपमा स्थान बनाउने लक्ष्यसहित नेपाली टोली प्रिमियर कपमा सहभागी भएको हो। प्रतियोगितामा १० टोली सहभागी छन्, जसलाई दुई समूहमा विभाजन गरिएको छ।
समूह ‘ए’मा नेपालसँगै बहराइन, हङकङ, मलेसिया र साउदी अरेबिया छन्। समूह ‘बी’मा संयुक्त अरब इमिरेट्स (युएई), कुवेत, ओमान, कतार र सिङ्गापुर रहेका छन्।
नेपालले समूह चरणको अन्तिम खेल भदौ २३ गते हङकङसँग खेल्नेछ। साउदी अरेबियासँग यसअघि भएका दुई खेलमध्ये नेपालले एकमा जित हासिल गरेको छ भने अर्को खेल रद्द भएको थियो।
५० ओभरको क्रिकेटमा हङकङविरुद्ध भने नेपालले चार खेल खेल्दा एक जित, दुई हार र एक खेलको अन्य नतिजा बेहोरेको छ।
दुवै समूहका शीर्ष दुई टोली सेमिफाइनलमा पुग्नेछन्। प्रतियोगिताको उपाधि जित्ने टोलीले सन् २०२७ को एसिया कपमा सिधै स्थान बनाउनेछ। त्यसैले आज साउदीविरुद्धको खेल नेपालका लागि महत्वपूर्ण मानिएको छ।
नेपाल आज पराजित भएमा सेमिफाइनल प्रवेशका लागि अन्तिम खेलको नतिजा र रनरेटमा निर्भर हुनुपर्ने अवस्था आउन सक्छ। त्यसैले सहज रूपमा अन्तिम चारमा पुग्न नेपाललाई आजको खेलमा जित आवश्यक छ।
