काठमाडौं। सभामुख डोलप्रसाद अर्यालले भोटेकोशी र त्रिशूली नदीमा आएको बाढीबाट प्रभावितको उद्धार, राहत तथा पुनःस्थापनामा राज्यका सबै संयन्त्र परिचालन गर्न सरकारलाई निर्देशन दिएका छन् ।
बुधबार प्रतिनिधिसभा बैठकमा विशेष प्रस्ताव प्रस्तुत गर्दै सभामुख अर्यालले भदौ १० को बाढीबाट रसुवाको टिमुरे, स्याफ्रुबेसी र बेत्रावती, नुवाकोटको त्रिशूली बजार तथा देवीघाटसहित धादिङ, चितवन र गोरखाका तटीय क्षेत्रमा ठूलो जनधनको क्षति भएको बताए । बाढीमा स्वदेशी तथा विदेशी नागरिकको मृत्यु भएको र केही अझै बेपत्ता रहेको उनले उल्लेख गरे ।
उनले घाइतेको उचित उपचार सुनिश्चित गर्न तथा प्रभावित महिला र बालबालिकाको सुरक्षा र मानसिक स्वास्थ्यमा विशेष ध्यान दिन सरकारको ध्यानाकर्षण गराए । राहत तथा पुनःस्थापनामा तीनै तहका सरकार, राजनीतिक दल, नागरिक समाज र राज्यका सबै संयन्त्रबीच समन्वय आवश्यक रहेको उनको भनाइ छ ।
जलवायु परिवर्तन र नेपालको कमजोर भू–संरचनाका कारण विपद्को जोखिम बढ्दै गएको उल्लेख गर्दै अर्यालले विपद्पछिको उद्धारमा मात्र निर्भर नभई पूर्वतयारीको संस्कृति विकास गर्नुपर्ने बताए । हिमाली क्षेत्रमा बढ्दो तापक्रम र हिमताल विस्फोटको जोखिमप्रति समेत उनले सरकारलाई सचेत गराए ।
‘जलवायु परिवर्तनबाट सिर्जित राष्ट्रिय सुरक्षा चुनौतीका सम्बन्धमा नेपालले आफ्नो मुद्दा अन्तर्राष्ट्रिय स्तरमा स्थापित गराउन आवश्यक छ,’ उनले भने।
प्रतिनिधिसभाले उद्धारमा खटिएका नेपाली सेना, नेपाल प्रहरी, सशस्त्र प्रहरी, स्थानीय प्रशासन, स्वास्थ्यकर्मी, स्वयंसेवक तथा सञ्चारकर्मीप्रति धन्यवाद ज्ञापन गरेको छ । सभामुखद्वारा प्रस्तुत विशेष प्रस्ताव सर्वसम्मतिले पारित गर्दै बैठकले मृतकप्रति श्रद्धाञ्जली र शोकसन्तप्त परिवारप्रति समवेदना व्यक्त गरेको छ ।
