काठमाडौँ । नेपाली एमएमए फाइटर रवीन्द्र ढाँट आज आफ्नो करिअरकै महत्वपूर्ण प्रतिस्पर्धामा उत्रँदैछन्।
‘बझाङ्गी बाघ’ उपनामले परिचित रवीन्द्रले रोड टु युएफसी सिजन–५ को सेमिफाइनलमा न्युजिल्यान्डका अपराजित फाइटर कासिब मर्डोकको सामना गर्दैछन्। चीनको साङ्घाईस्थित अक्टागनमा हुने यो प्रतिस्पर्धा शुक्रबार अपराह्न पौने ३ बजेपछि सुरु हुनेछ।
दुवै फाइटरको व्यावसायिक एमएमए रेकर्ड बलियो रहेकाले सेमिफाइनल निकै प्रतिस्पर्धात्मक हुने अपेक्षा गरिएको छ।
१० खेलमा ९ जित
बान्टमवेट विधामा प्रतिस्पर्धा गर्दै आएका रवीन्द्रले हालसम्म १० वटा व्यावसायिक एमएमए खेल खेलेका छन्। उनले नौ खेलमा जित हात पारेका छन् भने एक खेलमा मात्र पराजित भएका छन्।
सन् २०२३ मा इस्माइल खानसँग पराजित भएपछि रवीन्द्रले लगातार उत्कृष्ट प्रदर्शन गर्दै आएका छन्। गत वर्ष भारतको नोएडामा भएको म्याट्रिक्स फाइट नाइट–१७ को उपाधि जितेपछि उनको चर्चा थप चुलिएको थियो। उनले भारतीय फाइटर चुनरेङ कोरेनलाई तेस्रो चरणमा नकआउट गर्दै उपाधि जितेका थिए।
यससँगै रवीन्द्र म्याट्रिक्स फाइट नाइटको बान्टमवेट उपाधि जित्ने पहिलो नेपाली खेलाडी बनेका थिए।
गत मे महिनामा मकाउमा भएको रोड टु युएफसी सिजन–५ को क्वार्टरफाइनलमा उनले फिलिपिन्सका किम्बर्ट अलिन्टोजोनलाई पराजित गर्दै सेमिफाइनलमा स्थान बनाएका थिए। उनी रोड टु युएफसीको सेमिफाइनल पुग्ने पहिलो नेपाली फाइटरसमेत बनेका छन्।
अब मर्डोकलाई हराउँदै फाइनल पुगेर अर्को इतिहास रच्ने अवसर रवीन्द्रसामु छ।
मर्डोक पनि अपराजित
रवीन्द्रका प्रतिद्वन्द्वी मर्डोक पनि अहिलेसम्म अपराजित छन्। उनले आफ्नो व्यावसायिक एमएमए करिअरमा कुनै पनि खेल हारेका छैनन्।
मर्डोकले गत मे महिनामा भएको क्वार्टरफाइनलमा जापानका युनोसुके मिनामीलाई पराजित गर्दै सेमिफाइनलमा रवीन्द्रसँगको भेट पक्का गरेका थिए।
आजको सेमिफाइनल जित्दै रवीन्द्र रोड टु युएफसीको फाइनल पुग्ने पहिलो नेपाली फाइटर बन्ने लक्ष्यमा छन्। फाइनलमा समेत सफलता हात पार्न सके उनले प्रतिष्ठित एमएमए संस्था युएफसीसँग व्यावसायिक सम्झौता गर्ने अवसर प्राप्त गर्नेछन्।
