तनहुँ । तनहुँको भिमादबाट गोसाइँकुण्ड तीर्थयात्राका लागि रसुवा पुगेका चार जना परिवारको सम्पर्कमा आएका छन् । भिमाद नगरपालिका–६ का नारायण मरासिनी, बालकृष्ण पोखरेल, सन्देश पोखरेल र गणेश उप्रेती सकुशल रहेको जानकारी परिवारले पाएको हो ।
प्रमुख जिल्ला अधिकारी शिवलाल तिवारीका अनुसार उनीहरू चारै जना परिवारसँग सम्पर्कमा आएका छन् । रसुवाको भोटेकोशीमा आएको बाढीका कारण सम्पर्कविहीन भएका तनहुँका नागरिकको खोजी तथा अवस्थाबारे जानकारी लिने कार्य जारी रहेको उनले बताए ।
प्रजिअ तिवारीका अनुसार भानु नगरपालिका–१ का सञ्जीव गुरुङ भने अझै सम्पर्कविहीन छन् । गुरुङसहित तीन जना व्यवसायको सिलसिलामा टिमुरेतर्फ गएको बताइएको छ ।
त्यस्तै, भन्सार कार्यालयमा कार्यरत आँबुखैरेनी गाउँपालिका–३ का प्रेम सेढाईं, रसुवा हाइड्रोपावरमा कार्यरत ऋषिङ गाउँपालिका–७ का धनबहादुर आले र शुक्लागण्डकी नगरपालिका–१२, जसपुरका बिनु गुरुङ पनि सम्पर्कविहीन रहेको प्रशासनले जनाएको छ ।
रसुवा, नुवाकोट, धादिङलगायत बाढी प्रभावित क्षेत्र तथा आसपास पुगेका तनहुँका नागरिकमध्ये परिवार वा आफन्तको सम्पर्कमा नआएका व्यक्तिबारे तत्काल जानकारी गराउन तिवारीले आग्रह गरेका छन् ।
सम्पर्कविहीन व्यक्तिको खोजी तथा उद्धारमा सहजीकरणका लागि जिल्ला प्रशासन कार्यालय, नजिकको प्रहरी कार्यालय वा सञ्चारमाध्यममार्फत तत्काल सूचना दिन उनले अनुरोध गरेका छन् ।
विपद्को कठिन अवस्थामा सबैले आ–आफ्नो भूमिका र जिम्मेवारीअनुसार खोजी, उद्धार तथा राहत कार्यमा सहयोग गर्न पनि प्रमुख जिल्ला अधिकारी तिवारीले आग्रह गरेका छन्।
