काठमाडौँ । रसुवा र नुवाकोटमा आएको विनाशकारी बाढीका कारण उच्च जोखिम बढेपछि गोसाइँकुण्ड जाने पुरानो पदमार्ग बन्द गरिएको छ। पर्यटक तथा पदयात्रीको सुरक्षालाई मध्यनजर गर्दै नेपाल पर्यटन बोर्डले अर्को सूचना जारी नभएसम्म धुन्चे हुँदै गोसाइँकुण्ड जाने पुरानो मार्ग प्रयोग नगर्न आग्रह गरेको छ।
बोर्डका अनुसार अब पदयात्रीहरूले काठमाडौंबाट दुप्चेश्वर–सिसिपु–तालु–फेदी–सूर्यकुण्ड पास हुँदै गोसाइँकुण्ड पुग्ने वैकल्पिक मार्ग प्रयोग गर्नुपर्नेछ।
वैकल्पिक मार्गमा पर्ने सूर्यकुण्ड पास ४ हजार ६७५ मिटर र गोसाइँकुण्ड ४ हजार ३८० मिटर उचाइमा रहेका छन्।
बाढीका कारण उत्पन्न जोखिमलाई ध्यानमा राख्दै उक्त सुरक्षा सूचना सबैमा पुर्याउन तथा आपत्कालीन अवस्था आइपरेमा १००, १११४ वा १०२ मा सम्पर्क गर्न पर्यटन बोर्डले अनुरोध गरेको छ।
