मकवानपुर । बाढी प्रभावित क्षेत्रमा गएका मकवानपुरका ४० जनासँग सम्पर्क हुन नसकेपछि उनीहरूको अवस्था बुझिदिन स्थानीयवासीले जिल्ला प्रशासन कार्यालयमा आग्रह गरेका छन्।
मकवानपुरका विभिन्न स्थानबाट गोसाइँकुण्डलगायत बाढी प्रभावित क्षेत्रमा दर्शन तथा घुमघामका लागि पुगेका, सवारीसाधन चलाउँदै आएका तथा विभिन्न पेशामा आबद्ध व्यक्तिहरूसँग सम्पर्क हुन नसकेको भन्दै आफन्तहरूले प्रशासनमा जानकारी गराएका हुन्।
प्रमुख जिल्ला अधिकारी बसन्त अधिकारीका अनुसार आफन्तहरूले ४० जनाको अवस्थाबारे जानकारी लिन प्रशासनसमक्ष अनुरोध गरेका छन्।
“मकवानपुर स्थायी बसोबास भएका, गोसाइँकुण्डलगायत क्षेत्रमा दर्शन तथा घुम्न गएका, सवारीसाधन चलाउँदै आएका र विभिन्न पेशामा आबद्ध ४० जनासँग सम्पर्क हुन नसकेको भन्दै आफन्तहरूले जानकारी गराउनुभएको छ,” अधिकारीले भने।
उनका अनुसार बाढी प्रभावित क्षेत्रमा सञ्चार सम्पर्क सहज नभएकाले कतिपय व्यक्तिको अवस्थाबारे तत्काल जानकारी प्राप्त हुन नसकेको हुनसक्छ। प्रशासनले प्राप्त विवरणका आधारमा सम्बन्धित निकायसँग समन्वय गरी उनीहरूको अवस्थाबारे जानकारी लिने प्रयास गरिरहेको छ।
प्रदेश राजधानीसमेत रहेको हेटौँडाबाट विपद् व्यवस्थापन, उद्धार तथा सहयोगका लागि आवश्यकताअनुसार सम्बन्धित युनिटहरू परिचालन भइरहेको प्रमुख जिल्ला अधिकारी अधिकारीले बताए।
