काठमाडौं । रसुवामा आएको बाढीले गत वर्षको भन्दा ठूलो र विनाशकारी क्षति पुर्याएको नेपाली कांग्रेसका नेता एवं रसुवाका सांसद मोहन आचार्यले बताएका छन्। बाढीले रसुवा, नुवाकोट र धादिङका विभिन्न क्षेत्रमा ठूलो क्षति गरेको भन्दै उनले प्रभावित नागरिकको तत्काल उद्धार गर्न सरकारसँग आग्रह गरेका छन्।
बुधबार सिंहदरबारमा प्रधानमन्त्री बालेन्द्र साहसँग भेट गरेपछि पत्रकारसँग कुरा गर्दै आचार्यले सडकमार्ग अवरुद्ध भएकाले प्रभावित क्षेत्रमा तत्काल उद्धार तथा राहतका लागि हवाई माध्यम प्रयोग गर्नुपर्ने बताए। प्रभावित क्षेत्रका नागरिक त्रसित रहेको र धेरै परिवार आफन्तसँग सम्पर्कविहीन भएपछि चिन्तित बनेको उनले जानकारी दिए।
‘सोचेको भन्दा, अनुमान गरेको भन्दा पनि धेरै ठूलो क्षति भएको छ,’ आचार्यले भने, ‘बाइ रोडको बाटो नभएर अब बाइ एयरबाट गएर रेस्क्यु गर्न सकिन्छ, कति सहयोग गर्न सकिन्छ त्यसमा लागौँ।’
उनका अनुसार रसुवाको टिमुरे, स्याफ्रुबेसी, मैलुङबेसी र त्रिशूली बजारलगायत क्षेत्रमा बाढीले ठूलो क्षति पुर्याएको छ। टेलिफोन सम्पर्कसमेत विच्छेद भएकाले प्रभावित क्षेत्रको क्षतिको यकिन विवरण संकलन गर्न कठिनाइ भएको उनले बताए।
आचार्यका अनुसार तिब्बती क्षेत्रमा हिमताल विस्फोट भएपछि बाढी आएको हो। उनले प्रभावित नागरिकलाई तत्काल सुरक्षित स्थानमा सार्नुका साथै उद्धार, राहत र पुनःस्थापनाको कामलाई तीव्रता दिन सरकारसँग आग्रह गरेका छन्।
