वालिङ (स्याङ्जा)। स्याङ्जाको गल्याङमा सोमबार साँझ भएको जिप दुर्घटनामा दुई जनाको मृत्यु भएको छ भने १७ जना घाइते भएका छन्।
जिल्ला प्रहरी कार्यालय स्याङ्जाका सूचना अधिकारी रमेशदत्त अवस्थीका अनुसार दुर्घटनामा गल्याङ नगरपालिका–८ की २५ वर्षीया निशा पचभैया र गल्याङ–९ का ६० वर्षीय यमबहादुर विकको घटनास्थलमै मृत्यु भएको हो।
दुर्घटनामा घाइतेमध्ये गल्याङ–२ की २७ वर्षीया वसन्ती विश्वकर्मा र ४८ वर्षीया देवी विकको अवस्था गम्भीर रहेको प्रहरीले जनाएको छ। उनीहरूलाई थप उपचारका लागि पाल्पास्थित युनाइटेड मिशन अस्पताल पठाइएको छ।
अन्य घाइतेमध्ये पाँच जना सामान्य उपचारपछि घर फर्किएका छन् भने बाँकी घाइतेको गल्याङ नगर अस्पतालमा उपचार भइरहेको छ।
