काठमाडौं । नेपाल पर्वतारोहण संघले आठ हजार मिटरभन्दा अग्ला थप ६ वटा हिमाललाई अन्तर्राष्ट्रिय मान्यता दिलाउने प्रक्रिया अन्तिम चरणमा पुगेको जनाएको छ । प्रस्तावित ६ हिमालले मान्यता पाए नेपालमा अन्तर्राष्ट्रिय रूपमा मान्यताप्राप्त आठ हजार मिटरभन्दा अग्ला हिमालको संख्या १४ पुग्ने संघले जनाएको छ ।
सगरमाथा आरोही संघको २५औँ वार्षिकोत्सवका अवसरमा आइतबार काठमाडौंमा आयोजित कार्यक्रममा संघका अध्यक्ष फुर गेल्जे शेर्पाले थप ६ हिमालको मान्यताका लागि आवश्यक दस्तावेज तयार गर्ने काम भइरहेको जानकारी दिए ।
‘थप ६ वटा हिमालको अन्तर्राष्ट्रिय रिकजनाइजेशनका लागि काम गरिरहेका छौँ । यो कार्य अन्तिम चरणमा पुगेको छ, यसको डकुमेन्टेसनको काम भइरहेको छ,’ शेर्पाले भने ।
पर्यटन विभागले यसअघि आफ्नो पिक–प्रोफाइलमा ल्होत्से सार (८,४०० मिटर) र ल्होत्से सेन्टर (८,४१० मिटर)लाई आधिकारिक मान्यता दिइसकेको छ । त्यस्तै, ताप्लेजुङस्थित कञ्चनजंघा क्षेत्रमा कञ्चनजंघा सेन्टर (८,४७३ मिटर), कञ्चनजंघा साउथ (८,४७६ मिटर), यालुङखाङ (८,५०५ मिटर) र यालुङखाङ वेस्ट (८,०७७ मिटर) गरी चार नयाँ शिखर पहिचान भएका छन् ।
शेर्पाले नेपालको पर्वतीय पर्यटन विश्वकै उत्कृष्ट गन्तव्यका रूपमा विकास भइरहेको बताए । सरकार, पर्वतारोहणसम्बन्धी संघसंस्था र अन्य सरोकारवालाको संयुक्त प्रयासबाट पर्वतीय पर्यटनको विकास भइरहेको उनको भनाइ थियो ।
नेपाल सरकारले जारी गर्ने हिमाल तथा चुचुरोको सूची तयार पार्न नेपाल पर्वतारोहण संघले भूमिका खेल्दै आएको उल्लेख गर्दै उनले पर्वतारोहण क्षेत्रका प्राविधिक काममा समेत संघ संलग्न रहेको बताए । सगरमाथा आरोही संघ र नेपाल पर्वतारोहण संघबीच ‘नङ र मासु’को जस्तो सम्बन्ध रहेको उनको भनाइ थियो ।
