काठमाडौं । काठमाडौं महानगरपालिकाकी कार्यवाहक प्रमुख सुनिता डंगोलले कुष्ठरोग प्रभावितमाथि हुने भेदभाव र अधिकारबाट वञ्चित गर्ने प्रवृत्ति सामाजिक अन्याय भएको बताएकी छन् । उनले कुष्ठरोगभन्दा पनि रोगप्रति समाजले गर्ने व्यवहार ठूलो समस्या बनेको भन्दै सामाजिक मानसिकता परिवर्तनका लागि सचेतना आवश्यक रहेको बताइन् ।
आइतबार काठमाडौंमा आयोजित कुष्ठ प्रभावित व्यक्तिहरूको कानुनी साक्षरता तथा क्षमता अभिवृद्धि अभिमुखीकरण कार्यक्रममा बोल्दै डंगोलले कुष्ठरोग व्यक्तिको पहिचान नभई स्वास्थ्यसम्बन्धी अवस्था मात्र भएको बताइन् ।
‘कुष्ठरोग लागेका व्यक्तिलाई अपमान गर्नु, भेदभाव गर्नु र अधिकारबाट वञ्चित गर्नु भनेको सामाजिक अन्याय हो,’ उनले भनिन् ।
कुष्ठरोगबारे डर फैलाउनेभन्दा समयमै पहिचान र उपचारका विषयमा जनचेतना बढाउनुपर्नेमा उनले जोड दिइन् । कुष्ठरोग प्रभावितलाई देख्नेबित्तिकै फरक दृष्टिले हेर्ने सामाजिक मानसिकता अन्त्य गर्न सबै तहका सरकारले सचेतनामूलक कार्यक्रम सञ्चालन गर्नुपर्ने उनको भनाइ थियो ।
कुष्ठरोगसम्बन्धी सामाजिक सचेतना कार्यक्रम सञ्चालनका लागि काठमाडौं महानगरपालिका सरोकारवाला निकायसँग सहकार्य गर्न तयार रहेको पनि डंगोलले बताइन् ।
कार्यक्रममा उनले कानुनमा विभेदकारी व्यवस्था रहेको वा अनजानमा अधिकारबाट वञ्चित हुने अवस्था सिर्जना गर्ने प्रावधान भए त्यसलाई संशोधन गर्न सुझाव दिन कुष्ठ प्रभावितलाई आग्रह गरिन् । कानुनी साक्षरता तथा क्षमता अभिवृद्धि कार्यक्रममा सिकेका विषय समुदायसम्म पुर्याउनुपर्ने उनको भनाइ थियो ।
