काठमाडौं । पूर्वमन्त्री गोविन्दराज जोशीले भ्रष्टाचार मुद्दामा तोकिएको बाँकी कैद सजायबाट उन्मुक्ति पाएका छन्। विशेष अदालत र सर्वोच्च अदालतबाट भ्रष्टाचार मुद्दामा दोषी ठहर भएका जोशीले अब जेल सजाय भुक्तान गर्नुपर्ने छैन।
७५ वर्ष उमेर पुगेका ज्येष्ठ नागरिकलाई कैद सजायमा ७५ प्रतिशत छुट दिने कानुनी व्यवस्थाअनुसार जोशीले असार २४ गते कैद छुटको माग गर्दै निवेदन दिएका थिए। उक्त निवेदनमाथि शुक्रबार न्यायाधीश नारायणप्रसाद पौडेल, हेमन्त रावल र उमेश कोइरालाको इजलासमा सुनुवाइ भएको थियो। बहुमतका आधारमा इजलासले उनलाई कैद छुट दिने आदेश गरेको हो।
अख्तियार दुरुपयोग अनुसन्धान आयोगको अनुसन्धानका क्रममा जोशी यसअघि नै ३ महिना १७ दिन थुनामा बसेका थिए। सोही अवधिलाई आधार बनाएर बाँकी कैद सजाय छुट गर्न उनले माग गरेका थिए।
तर, कैद छुटको सुविधा लिनका लागि व्यक्ति कारागारमा बसेको हुनुपर्ने वा नपर्ने विषयमा न्यायाधीशहरूबीच मतभेद देखिएको थियो। न्यायाधीशद्वय पौडेल र कोइरालाले कारागारमा नबसे पनि ज्येष्ठ नागरिकले कैद छुटको सुविधा पाउन सक्ने राय दिएका थिए। अर्का न्यायाधीश रावलले भने कारागारमा बसेका व्यक्तिले मात्रै यस्तो सुविधा माग गर्न सक्ने मत राखेका थिए।
जोशीलाई विशेष अदालतले २०६९ साउन १० गते भ्रष्टाचार मुद्दामा १ वर्ष ६ महिना कैद तथा २ करोड १६ लाख १४ हजार ३७६ रुपैयाँ ४१ पैसा जरिवाना तोकेको थियो। त्यसको १२ वर्षपछि सर्वोच्च अदालतले विशेष अदालतको फैसला केही उल्ट्याउँदै २०८१ साउन १३ गते ९ महिना कैद र ६९ लाख २६ हजार २३८ रुपैयाँ जरिवाना हुने फैसला गरेको थियो।
सर्वोच्चबाट कैद तथा जरिवाना तोकिए पनि जोशीले उक्त कैद सजाय भुक्तान गरेका थिएनन्। अब ज्येष्ठ नागरिकसम्बन्धी कानुनी व्यवस्थाअनुसार उनको बाँकी कैद छुट भएको हो।
नेपाली कांग्रेसका पूर्वसहमहामन्त्रीसमेत रहेका जोशी पछिल्लो समय पार्टीभित्र छुट्टै समूह सञ्चालन गर्दै आएका छन्।
