ललितपुर । राज्य व्यवस्था तथा सुशासन समितिका सभापति एवं राष्ट्रिय स्वतन्त्र पार्टीका सांसद हरि ढकालले मुलुकको प्रमुख प्रशासनिक केन्द्र सिंहदरबारको नाम परिवर्तन गरी ‘अनामनगर दरबार’ राख्न प्रस्ताव गरेका छन्।
ललितपुरमा आइतबार आयोजित एक कार्यक्रममा ढकालले राजनीतिक परिवर्तनपछि देशका विभिन्न स्थान र विमानस्थलको नाम परिवर्तन भए पनि सिंहदरबारको नाम यथावत् रहेको भन्दै प्रश्न उठाए। नेपालमा सिंह नै नभएको उल्लेख गर्दै उनले सिंहदरबार नामको सान्दर्भिकतामाथि समेत प्रश्न गरे।
“हामीसँग सिंह नै छैन, तर नाम सिंहदरबार छ,” उनले भने, “परिवर्तनपछि यसको नाम ‘अनामनगर दरबार’ राख्न सकिन्थ्यो।”
ढकालले नाम मात्र होइन, सिंहदरबारको कार्यशैली, हाउभाउ र भाष्यसमेत परिवर्तन गर्नुपर्ने बताए। प्रशासनिक केन्द्रको ‘मुहान’मै सुधार आवश्यक रहेको उल्लेख गर्दै उनले परम्परागत सोच र शैलीलाई चिर्नुपर्नेमा जोड दिए।
