काठमाडौँ– सरकारले सुरु गरेको करदाता प्रोत्साहन उपहार योजना अन्तर्गत साउन महिनाको पहिलो १५ दिनको नतिजा सार्वजनिक गरेको छ। आन्तरिक राजस्व विभागले अर्थ मन्त्रालयमा आयोजित कार्यक्रममा भाग्यशाली विजेताहरूको घोषणा गरेको हो।

विभागका अनुसार शिव कृष्ण जनरल स्टोरबाट रु. २५० बराबरको सामान खरिद गरी सक्कली बिल लिएका एक उपभोक्ताले रु. १० लाखको बम्पर उपहार जितेका छन्। बम्पर विजेताको कुपन नम्बर ००७ ३१५ २५४ ४९३ रहेको विभागले जनाएको छ।

यस्तै, अन्य १५ जना उपभोक्ताले जनही रु. १ लाख नगद पुरस्कार जितेका छन्।

उपभोक्तामा सामान वा सेवा खरिद गर्दा अनिवार्य रूपमा सक्कली बिल लिने बानीको विकास गराउने तथा कर प्रणालीलाई थप पारदर्शी र प्रभावकारी बनाउने उद्देश्यले सरकारले चालु आर्थिक वर्षको बजेटमार्फत यो योजना लागू गरेको हो।

आर्थिक वर्ष २०८३/८४ को बजेट प्रस्तुत गर्दै अर्थमन्त्री डा. स्वर्णिम वाग्लेले करदाता प्रोत्साहन उपहार कार्यक्रम सञ्चालन गर्ने घोषणा गरेका थिए। सोही घोषणाअनुसार असारको अन्तिम साता स्वीकृत कार्यविधिका आधारमा योजना कार्यान्वयनमा ल्याइएको हो।

कसरी सहभागी हुने?

योजनामा सहभागी हुन आन्तरिक राजस्व विभागले prize.ird.gov.np वेबसाइट सञ्चालनमा ल्याएको छ।

नेपालभित्र व्यक्तिगत प्रयोजनका लागि एक पटकमा रु. १०० भन्दा बढीको वस्तु वा सेवा खरिद गरी सक्कली बिल लिएका उपभोक्ताले उक्त वेबसाइटमा आफ्नो बिल अपलोड गरेर कार्यक्रममा सहभागी हुन सक्छन्।

त्यस्तै, बैंक वा डिजिटल वालेटको क्यूआरमार्फत रु. १०० भन्दा बढीको भुक्तानी गर्ने उपभोक्ताको विवरण भने स्वतः प्रणालीमा समावेश हुने भएकाले उनीहरूले छुट्टै बिल दर्ता गर्नुपर्ने छैन। यस्ता उपभोक्ताले भने आफ्नो भुक्तानीको ट्रान्स्याक्सन नम्बर डाउनलोड गरेर सुरक्षित राख्नुपर्नेछ।

कार्यविधिअनुसार हरेक दिन एक जना उपभोक्तालाई कर कट्टीपछि रु. १ लाख नगद तथा हरेक १५ दिनमा एक जना (महिनामा दुई जना) लाई रु. १० लाखको बम्पर नगद उपहार प्रदान गरिने व्यवस्था गरिएको छ।