काठमाडौं । एलपी ग्यास उद्योग संघ नेपालले बजारमा ग्यासको सहजताका लागि कम्तीमा एक महिना पुग्ने ग्यास मौज्दात भएका उपभोक्ताहरुलाई तत्काल लाइनमा नबस्न अपिल गरेको छ ।
विगतमा तेस्रो मुलुकमा भएको अप्रत्याशित द्वन्द्वका कारण ग्यास आयात प्रभावित भएर आधा सिलिन्डर (७.१ के.जी.) मात्र उपलब्ध गराइएको थियो ।
हाल अन्तर्राष्ट्रिय परिस्थितिमा सुधार आएर आयात साविकबमोजिम नियमित भइसकेको छ । अबदेखि साविकबमोजिम नै पूर्ण क्षमताको (१४.२ केजी) सिलिन्डर प्रयोग नियमित गरिएको संघले जनाएको छ ।
संघले सबैले खाली सिलिन्डर एकैपटक भर्न खोज्दा बजारमा ग्यास अभावको मुख्य कारण रहेको निष्कर्ष निकालिएको छ ।
यस समस्याको समाधानका लागि नेपाल आयल निगम लिमिटेड, उद्योगी, विक्रेता र उपभोक्ता बीच हातेमालो आवश्यक रहेकोमा जोड दिइएको छ ।
विक्रेताहरुलाई उपलब्ध ग्यास आम उपभोक्ताको प्राथमिकताका आधारमा पारदर्शी र व्यवस्थित ढङ्गले वितरण गर्न संघले भनेको छ ।
साथै, उद्योगहरुलाई बजारमा नियमित ग्यास पठाउन र निगमले बजार सहज नभएसम्म नियमितभन्दा बढी ग्यास आयात गर्न पनि संघले अपिल गरेको छ ।
