म्याड्रिड । स्पेनका राजा फिलीप छैठौँले म्याड्रिड आसपास र देशका अन्य क्षेत्रमा फैलिएको भीषण डढेलोले राष्ट्रको प्राकृतिक सम्पदामा अपूरणीय क्षति पुर्याएको बताएका छन्।
करिब एक सातादेखि जारी डढेलोका कारण म्याड्रिड, आभिला, टोलेडो र पूर्वी क्षेत्र क्यास्टेलोन प्रभावित भएका छन्। सुरक्षा जोखिम बढेपछि यी क्षेत्रबाट करिब ७५ हजार मानिसलाई सुरक्षित स्थानमा सारिएको अधिकारीहरूले जनाएका छन्।
राजधानी म्याड्रिडमा विस्थापितहरूका लागि बनाइएको अस्थायी आश्रयस्थलको भ्रमणपछि सञ्चारकर्मीसँग कुरा गर्दै राजा फिलीपले धेरै परिवारले ठूलो पीडा भोग्नुपरेको बताए।
“कतिपय मानिस चार दिनदेखि घर फर्किन सकेका छैनन्, धेरैले आफ्नो सम्पत्ति गुमाएका छन्। सामूहिक रूपमा हामीले अमूल्य प्राकृतिक सम्पदा गुमाएका छौँ,” उनले भने।
राजा फिलीपले डढेलो नियन्त्रणका लागि सरकारले सबै उपलब्ध स्रोत परिचालन गर्दै निरन्तर प्रयास गरिरहेको जानकारी आफूले पाएको पनि बताए।
यसअघि प्रधानमन्त्री पेद्रो सान्चेजले डढेलो नियन्त्रणमा खटिएका टोलीहरूले नागरिकको ज्यान जोगाउन कठिन परिस्थितिमा काम गरिरहेको बताएका थिए। उनले तापक्रम केही घटे पनि हावाको गति बढ्न सक्ने पूर्वानुमानका कारण आगामी घण्टाहरू चुनौतीपूर्ण रहने चेतावनी दिए।
“हाम्रो पहिलो प्राथमिकता नागरिकको ज्यान बचाउनु र बस्तीहरू सुरक्षित राख्नु हो। यही हाम्रो मुख्य लक्ष्य हो,” सेनिसिएन्तोस गाउँको भ्रमणका क्रममा प्रधानमन्त्री सान्चेजले भने।
अधिकारीहरूले यो डढेलोलाई उक्त क्षेत्रको इतिहासकै सबैभन्दा भीषणमध्ये एक बताएका छन्। राजधानीको पश्चिमी क्षेत्रमा बाक्लो खरानीमिश्रित धुवाँले आकाश ढाकेको छ भने डढेको गन्ध म्याड्रिडको केन्द्रसम्म फैलिएको छ। धुवाँका कारण धेरै बासिन्दाले घाँटी पोल्ने र चिलाउने समस्या भोगिरहेका छन् भने स्वास्थ्य सुरक्षाका लागि झ्याल–ढोका बन्द राख्न आग्रह गरिएको छ।
यद्यपि रातभरको प्रयासपछि केही क्षेत्रमा आगो नियन्त्रणतर्फ प्रगति भएको अधिकारीहरूले बताएका छन्। तर तीव्र हावा र प्रतिकूल मौसमका कारण डढेलो पूर्ण रूपमा नियन्त्रणमा लिन अझै कठिनाइ रहेको जनाइएको छ।
