काठमाडौँ । आईसीसी क्रिकेट विश्वकप लिग–२ अन्तर्गत नेदरल्यान्ड्समा जारी त्रिकोणात्मक एकदिवसीय शृंखलामा लगातार दुई खेलमा हार बेहोरेको नेपालले सोमबार नामिबियाविरुद्ध मैदान उत्रिँदै छ। नेपाल र नामिबियाबीचको खेल नेपाली समयअनुसार दिउँसो ४ः४५ बजे सुरु हुनेछ।
शृंखलाको सुरुवाती दुई खेलमा नेपालले ब्याटिङ, बलिङ र फिल्डिङ तीनै विभागमा अपेक्षित प्रदर्शन गर्न नसक्दा लगातार पराजय भोगेको हो। पहिलो खेलमा नामिबियासँग ८ विकेटले पराजित भएको नेपाल दोस्रो खेलमा घरेलु टोली नेदरल्यान्ड्ससँग ६ विकेटले पराजित भयो।
पहिलो खेलमा टस हारेर पहिले ब्याटिङ गरेको नेपाल जेजे स्मिथको घातक बलिङसामु निरीह बन्यो। नेपाली टोली १५८ रनमा समेटिएपछि नामिबियाले उक्त लक्ष्य ३७.४ ओभरमा मात्र दुई विकेट गुमाएर सहज रूपमा भेट्टाएको थियो।
दोस्रो खेलमा पनि नेपालको प्रदर्शनमा खास सुधार देखिएन। नेपालले फेरि १५८ रनको लक्ष्य प्रस्तुत गरे पनि नेदरल्यान्ड्सले ३५ ओभरमै चार विकेट गुमाएर लक्ष्य पूरा गर्दै लगातार दोस्रो जित दर्ता गर्यो।
लगातार दुई हारपछि नेपालमाथि अब बाँकी दुवै खेल जित्नुपर्ने दबाब छ। विश्वकपको ग्लोबल क्वालिफायरमा शीर्ष चारभित्र रहँदै सिधै स्थान बनाउन नेपालको सम्भावना कमजोर बन्दै गएको छ।
हालसम्म ३० खेल खेलेको नेदरल्यान्ड्स ३६ अंकसहित तालिकाको तेस्रो स्थानमा छ। नेपाल र नामिबियाले समान ३० खेलबाट २४–२४ अंक जोड्दै क्रमशः पाँचौं र छैटौं स्थान ओगटेका छन्।
नेपालले सोमबार नामिबियासँग प्रतिस्पर्धा गरेपछि बुधबार शृंखलाको अन्तिम खेलमा पुनः नेदरल्यान्ड्ससँग खेल्नेछ। विश्वकप छनोटको सम्भावना जीवित राख्न नेपालका लागि अब बाँकी सबै खेल जित्नु अनिवार्यजस्तै बनेको छ।
