काठमाडौं- फिफा विश्वकप २०२६ को फाइनलमा स्पेनसँग १–० ले पराजित भएपछि अर्जेन्टिनाका कप्तान लियोनल मेसी भावुक बनेका छन्। अतिरिक्त समयमा भएको हारपछि सम्भावित अन्तिम विश्वकप खेल खेलेका मेसीले यो पीडा बिर्सन समय लाग्ने बताएका छन्।
फाइनलको एक दिनपछि सोमबार इन्स्टाग्राममार्फत समर्थकलाई सम्बोधन गर्दै मेसीले रजत पदक बोकेको आफ्नो तस्बिर सार्वजनिक गरेका छन्। उनले लेखेका छन्, “यो पीडा निकै ठूलो छ, र यो घाउ निको हुन समय लाग्नेछ।”
हारको निराशाबीच पनि मेसीले टोलीको प्रदर्शनप्रति गर्व व्यक्त गरेका छन्। उनले अर्जेन्टिनाले अन्तिमसम्म संघर्ष गरेको, अविस्मरणीय क्षणहरू सिर्जना गरेको र समर्थकको निरन्तर साथले टोलीलाई फेरि विश्व फुटबलको शीर्ष टोलीमध्ये एक बनाएको उल्लेख गरेका छन्।
उनले लगातार दोस्रो पटक विश्वकपको फाइनलसम्म पुग्नु नै ठूलो उपलब्धि भएको पनि बताएका छन्। अर्जेन्टिनाले यसअघि सन् २०२२ को कतार विश्वकपमा फ्रान्सलाई पेनाल्टी सुटआउटमा हराउँदै उपाधि जितेको थियो।
उत्तर अमेरिकामा आयोजित २०२६ विश्वकपमा अर्जेन्टिनाले सेमिफाइनलमा इंग्ल्यान्डलाई पराजित गर्दै फाइनल यात्रा तय गरेको थियो। तर उपाधि भिडन्तमा स्पेनको सशक्त रक्षापङ्क्तिविरुद्ध अर्जेन्टिना प्रभाव जमाउन असफल रह्यो र अतिरिक्त समयमा गोल खाँदै उपाधिबाट वञ्चित भयो।
यस विश्वकपका क्रममा ३९ वर्ष पुगेका मेसीले सन् २०३० को विश्वकप खेल्ने वा नखेल्नेबारे भने कुनै स्पष्ट संकेत दिएका छैनन्। अर्को विश्वकप स्पेन, पोर्चुगल र मोरक्कोले संयुक्त रूपमा आयोजना गर्नेछन्।
समर्थकप्रति आभार व्यक्त गर्दै मेसीले सबै शुभकामना र समर्थनका लागि धन्यवाद दिएका छन्। साथै, विश्वकप उपाधि जितेकोमा स्पेनलाई बधाई पनि दिएका छन्।
व्यक्तिगत उपलब्धितर्फ, मेसीले प्रतियोगिताका क्रममा जर्मनीका मिरोस्लाभ क्लोजको १६ विश्वकप गोलको कीर्तिमान पार गर्दै आफ्नो कुल विश्वकप गोल संख्या २१ पुर्याएका थिए। तर फ्रान्सका किलियन एम्बाप्पेले २२ गोलसहित विश्वकप इतिहासकै सर्वाधिक गोलकर्ताको कीर्तिमान कायम गरे। एम्बाप्पेले प्रतियोगितामा १० गोल गर्दै गोल्डेन बुट जित्दा मेसीले ८ गोल गरेका थिए।
