काठमाडौं । अर्जेन्टिनाका कप्तान लियोनल मेस्सी फिफा विश्वकप २०२६ को गोल्डेन बुट दौडमा शीर्ष स्थानमा उक्लिएका छन्। सेमिफाइनलमा इंग्ल्यान्डविरुद्ध गोल गर्न नसके पनि दुई असिस्ट गर्दै उनले प्रतिस्पर्धी किलियन एमबाप्पेलाई पछि पारेका हुन्।
अमेरिकाको एटलान्टामा बिहीबार बिहान भएको दोस्रो सेमिफाइनलमा अर्जेन्टिनाले इंग्ल्यान्डलाई २–१ ले पराजित गर्दै लगातार दोस्रो पटक विश्वकपको फाइनलमा स्थान बनायो। टोलीको पुनरागमन जितमा मेस्सीले दुवै गोलमा निर्णायक असिस्ट गर्दै महत्त्वपूर्ण भूमिका निर्वाह गरे।
मेस्सी र फ्रान्सका कप्तान किलियन एमबाप्पे दुवैले प्रतियोगितामा हालसम्म ८–८ गोल गरेका छन्। तर मेस्सीको नाममा ४ असिस्ट पुगेको छ भने एमबाप्पेको ३ असिस्ट मात्र रहेकाले गोल्डेन बुटको दौडमा मेस्सी अगाडि छन्।
स्पेनसँग सेमिफाइनलमा पराजित हुँदै फ्रान्स विश्वकपबाट बाहिरिए पनि एमबाप्पेसँग तेस्रो स्थानका लागि इंग्ल्यान्डविरुद्ध खेल्ने अवसर बाँकी छ। त्यसैले उनको गोल संख्या थपिने सम्भावना अझै कायम छ।
गोल्डेन बुटको प्रतिस्पर्धामा रहेका अन्य खेलाडीहरू भने मेस्सीभन्दा धेरै पछाडि छन्। नर्वेका एर्लिङ हालान्ड ७ गोलसहित तेस्रो स्थानमा रहे पनि उनको टोली प्रतियोगिताबाट बाहिरिसकेको छ। इंग्ल्यान्डका ह्यारी केन र जुड बेलिङ्घमले समान ६ गोल गरेका थिए, तर सेमिफाइनलमा अर्जेन्टिनासँग पराजित भएपछि उनीहरूको दाबेदारी समाप्त भएको छ। फ्रान्सका उस्मान डेम्बेले पनि ५ गोलका साथ दौडबाट बाहिरिएका छन्।
फाइनलमा पुगेको स्पेनका मिकेल ओयार्जाबाल ५ गोलसहित शीर्ष गोलकर्ताको सूचीमा सातौं स्थानमा छन्। फाइनलमा असाधारण प्रदर्शन नगरेसम्म उनले मेस्सीलाई उछिन्न कठिन देखिन्छ।
यदि फाइनलपछि पनि कुनै खेलाडीले मेस्सीलाई गोल संख्यामा उछिन्न नसके, उनले आफ्नो करियरमा पहिलो पटक फिफा विश्वकपको गोल्डेन बुट अवार्ड जित्नेछन्।
यसअघि मेस्सीले विश्वकपमा दुई पटक गोल्डेन बल अवार्ड जितिसकेका छन्। उनले सन् २०१४ मा अर्जेन्टिनालाई फाइनल पुर्याउँदा पहिलो पटक र सन् २०२२ मा टोलीलाई विश्व च्याम्पियन बनाउँदा दोस्रो पटक उत्कृष्ट खेलाडीको सम्मान प्राप्त गरेका थिए। उनी दुई पटक गोल्डेन बल जित्ने विश्वकप इतिहासकै पहिलो र एकमात्र खेलाडी हुन्।
यस विश्वकपमा अर्जेन्टिनालाई पुनः फाइनलमा पुर्याएसँगै मेस्सी गोल्डेन बल अवार्डका पनि प्रमुख दाबेदार बनेका छन्। अब उनको लक्ष्य अर्जेन्टिनालाई लगातार दोस्रो विश्वकप उपाधि दिलाउनुका साथै व्यक्तिगत रूपमा पहिलो गोल्डेन बुट जित्नु रहेको छ।
