काठमाडौँ । फिफा विश्वकप २०२६ मा रेफ्रीको भूमिका निर्वाह गर्ने तयारीमा रहेका सोमालियाली फुटबल रेफ्री ओमार अब्दुल्कादिर अर्तानलाई अमेरिका प्रवेशमा रोक लगाइएको छ ।
सन् २०२५ मा ‘कन्फेडेरेसन अफ अफ्रिकन फुटबल’मा सर्वोत्कृष्ट रेफ्री घोषित भएका अर्टानलाई मियामी अन्तर्राष्ट्रिय विमानस्थलबाटै फिर्ता गरिएको हो । अर्टानले अमेरिका प्रवेशका लागि अनुमति नपाएपछि विश्वकपमा रेफ्री गर्ने अवसर गुमाएका छन् ।
विश्व फुटबलको सर्वोच्च निकाय फिफाले पनि विज्ञप्ति जारी गर्दै अर्टानले यसपटकको विश्वकपमा खेल सञ्चालन गर्न नपाउने पुष्टि गरेको छ ।
फिफाले भनेको छ, ‘अमेरिका प्रवेशमा रोक लागाइका कारण अर्टानले विश्वकपमा सहभागिता जनाउन सक्नुहुने छैन । आयोजक राष्ट्रको अध्यागमन प्रक्रिया र भिसाको निर्णयमा फिफाको भूमिका हुँदैन । यो विषय सम्बन्धित राष्ट्रको अधिकार क्षेत्रभित्र पर्छ ।’
अमेरिकी अध्यागमन अधिकारीहरूले अर्टानलाई प्रवेश निषेध गर्नुको ठोस कारण भने खुलाएका छैनन् । हाल उनी टर्कीमा रहेको बताइएको छ ।
