काठमाडौँ। सीमासम्बन्धी विषयमा प्रधानमन्त्री वालेन्द्र शाह (बालेन) ले दिएको भनिएको अभिव्यक्तिको विरोध गर्दै नेपाली कम्युनिस्ट पार्टी (नेकपा) निकट संगठनहरूले माइतीघर मण्डलामा प्रदर्शन गरेका छन्।
पार्टीले प्रधानमन्त्रीको अभिव्यक्ति राष्ट्रिय हित विपरीत रहेको दाबी गर्दै आफ्ना जनवर्गीय संगठनहरूलाई विरोध कार्यक्रमका लागि परिचालन गरेको जनाएको छ।
विरोध प्रदर्शनको नेतृत्व जनवर्गीय संगठन समन्वय मोर्चाका प्रमुख राजेन्द्र पाण्डेले गरेका थिए। प्रदर्शनमा सहभागीहरूले प्रधानमन्त्रीले पदमा रहिरहन नैतिक आधार गुमाएको दाबी गर्दै राजीनामाको माग गरेका थिए।
कार्यक्रमलाई सम्बोधन गर्दै नेकपाका नेता सुदेश पराजुलीले देशको कार्यकारी नेतृत्वबाट आएको भनिएको अभिव्यक्तिले राष्ट्रिय स्वाभिमानसँग सम्बन्धित विषयमा गम्भीर प्रश्न उठाएको टिप्पणी गरे।
उनले राष्ट्रियताको पक्षमा दबाब सिर्जना गर्न आफ्नो पार्टी सडक आन्दोलनमा उत्रिएको बताउँदै सरकारबाट स्पष्ट जवाफ र जिम्मेवारीको अपेक्षा गरिएको धारणा राखे।
प्रदर्शनका क्रममा सहभागीहरूले प्रधानमन्त्रीको अभिव्यक्तिप्रति असहमति जनाउँदै त्यसलाई सच्याउन तथा राजनीतिक जवाफदेहिता सुनिश्चित गर्न माग गरेका थिए।
