काठमाडौँ । नेपाली कम्युनिस्ट पार्टी (नेकपा) ले असोज ९ देखि ११ गतेसम्म देशका विभिन्न भागमा भारीदेखि धेरै भारी वर्षा हुन सक्ने पूर्वानुमानपछि सम्भावित बाढी, पहिरो, डुबानलगायत प्राकृतिक विपद्को जोखिमप्रति उच्च सतर्कता अपनाउन आम नागरिकलाई अपिल गरेको छ ।
जल तथा मौसम विज्ञान विभागले बङ्गालको खाडीको पूर्वी भाग अर्थात् उत्तर अण्डमान सागर आसपास विकसित न्यून चापीय मौसमी प्रणालीका कारण मेघगर्जन र चट्याङसहित भारी वर्षा हुन सक्ने पूर्वानुमान गरेपछि नेकपाले बिहीबार अपिल जारी गरेको हो ।
नेकपाका प्रवक्ता प्रकाश ज्वालाद्वारा जारी अपिलमा वर्षाका कारण नदी तथा खोलामा पानीको बहाव बढ्ने, आकस्मिक बाढी, पहिरो तथा गेग्रान बाढी आउने र विभिन्न क्षेत्रमा डुबान हुन सक्ने जोखिम औँल्याइएको छ । साथै, उच्च हिमाली क्षेत्रमा हिमपात हुनुका साथै सडक तथा हवाई यातायातसमेत प्रभावित हुन सक्ने भएकाले सावधानी अपनाउन आग्रह गरिएको छ ।
अपिलमा नदी तथा खोलानाला आसपासका क्षेत्र, पहिरोको जोखिम भएका पहाडी तथा भिराला भूभाग, डुबान हुन सक्ने क्षेत्र र उच्च हिमाली क्षेत्रमा विशेष सतर्कता अपनाउन भनिएको छ ।
केही समयअघि रसुवा–भोटेकोशी क्षेत्रमा आएको विनाशकारी बाढीबाट ठूलो जनधनको क्षति भएको र प्रभावित समुदाय अझै कठिन अवस्थामा रहेकाले पुनः अर्को प्राकृतिक विपद्को जोखिमप्रति सबै पक्ष गम्भीर बन्नुपर्ने नेकपाले जनाएको छ ।
नेकपाले नागरिकलाई अत्यावश्यक कामबाहेक जोखिमपूर्ण यात्रा तथा हिँडडुल नगर्न, लामो दूरी र रातिको समयमा यात्रा नगर्न तथा नदी, खोला किनार र बाढीपहिरोको जोखिम भएका क्षेत्रमा नजान आग्रह गरेको छ ।
त्यस्तै, जोखिमयुक्त स्थानमा बसोबास गरिरहेका नागरिकलाई समयमै सुरक्षित स्थानमा जान तथा पशुचौपाया, औषधि, बहुमूल्य सम्पत्ति, महत्त्वपूर्ण कागजात, खाद्यान्न र लत्ताकपडालगायत आवश्यक सामग्री सुरक्षित राख्न अनुरोध गरिएको छ ।
अपिलमा बालबालिका, ज्येष्ठ नागरिक, असहाय, अपाङ्गता भएका व्यक्ति, गर्भवती तथा सुत्केरी महिला र बिरामीजस्ता संवेदनशील समूहको सुरक्षामा विशेष ध्यान दिन सबै तहका सरकार तथा सम्बन्धित पक्षलाई आग्रह गरिएको छ ।
यसैगरी, स्थल तथा हवाई यात्रा गर्नुपर्ने अवस्था आएमा सम्बन्धित सरकारी तथा सुरक्षा निकायबाट जारी पछिल्लो सूचना र मौसमको अवस्था बुझेर मात्र यात्रा गर्न नेकपाले सबैलाई अनुरोध गरेको छ ।
