कैलाली । कैलालीको गोदावरी नगरपालिका–१ अत्तरियामा खसीको भन्दै बाख्राको मासु बिक्री गरेको तथा कुकुरको मासु बेच्न खोजेको आरोपमा प्रहरीले तीन जनालाई पक्राउ गरेको छ।
शुक्रबार अत्तरिया बजारको धनगढी लाइनमा सञ्चालित रफिक मासु पसलबाट पसल सञ्चालक भारतीय नागरिक ६५ वर्षीय रफिक कुरेसी र कञ्चनपुरको कृष्णपुरका ४१ वर्षीय गणेश धामी पक्राउ परेका हुन्।
जिल्ला प्रहरी कार्यालय कैलालीका डीएसपी योगेन्द्र तिमिल्सिनाका अनुसार उनीहरूलाई खसीको भन्दै बाख्राको मासु बिक्री गरेको आरोपमा पक्राउ गरिएको हो। पक्राउ परेका दुवै जनामाथि इलाका प्रहरी कार्यालय मालाखेतीले अनुसन्धान गरिरहेको छ।
प्रहरीले पसलबाट बरामद गरेको मासु परीक्षणका लागि प्रयोगशालामा पठाएको छ। प्रयोगशाला परीक्षणको रिपोर्ट आएपछि मासु कुन जनावरको हो भन्ने यकिन हुने प्रहरीले जनाएको छ।
यसैबीच, बिहीबार इलाका प्रहरी कार्यालय मालाखेतीबाट खटिएको टोलीले गोदावरी नगरपालिका–१ स्थित अत्तरिया बसपार्कबाट ६५ वर्षीय सुरेश नेपालीलाई पनि पक्राउ गरेको थियो। उनलाई कुकुरको मासु काटेर बिक्री गर्न खोजेको सूचनाका आधारमा नियन्त्रणमा लिइएको प्रहरीले जनाएको छ।
गोदावरी नगरपालिका–२ घर भएका नेपालीले भने अनुसन्धानका क्रममा आफूले खानका लागि स्यालको मासु काटेको बताएका छन्। प्रहरीले उनीबाट बरामद गरेको मासु पनि परीक्षणका लागि प्रयोगशालामा पठाएको छ।
प्रहरीका अनुसार उक्त मासु कुकुर, स्याल वा अन्य कुन जनावरको हो भन्ने अहिलेसम्म पुष्टि भएको छैन। प्रयोगशाला परीक्षणपछि मात्रै मासुको वास्तविक पहिचान खुल्ने प्रहरीले जनाएको छ।
