काठमाडौँ । आईजीआई प्रुडेन्सियल इन्स्योरेन्स लिमिटेडका अध्यक्ष हेमराज ढकालले स्वदेशी बीमा कम्पनीहरू पुँजी संरचना र व्यवस्थापन क्षमताका दृष्टिले सुदृढ बन्दै गएको उल्लेख गर्दै अब अन्तर्राष्ट्रिय बजारमा सेवा विस्तार गर्न सक्षम अवस्थामा पुगेको बताएका छन्।
कम्पनीको नयाँ केन्द्रीय कार्यालय भवन उद्घाटन कार्यक्रमलाई सम्बोधन गर्दै उनले प्रारम्भिक चरणमा दक्षिण एसिया र अफ्रिकी मुलुकहरूलाई लक्षित गरी सेवा विस्तारको तयारी गर्न सकिने धारणा व्यक्त गरे। त्यसका लागि नियामक निकायबाट आवश्यक नीतिगत तथा प्रक्रियागत सहजीकरण आवश्यक रहने उनको भनाइ थियो।
कार्यक्रममा नेपाल बीमा प्राधिकरण का कार्यकारी निर्देशक सुशील देव सुवेदी ले बीमा क्षेत्रको नियामक संस्थाको हैसियतमा स्वदेशी कम्पनीहरूको अन्तर्राष्ट्रिय उपस्थितिलाई प्रोत्साहन गर्ने सोचप्रति सकारात्मक रहेको स्पष्ट पारे। उनले विश्व बजारमा प्रवेशका लागि आवश्यक नीतिगत समर्थन उपलब्ध गराउन प्राधिकरण प्रतिबद्ध रहने संकेत दिए।
नीतिगत सहजीकरण सुदृढ भएमा नेपाली बीमा कम्पनीहरूको सेवा दायरा अन्तर्राष्ट्रिय स्तरसम्म विस्तार भई समग्र बीमा बजारको आकार र प्रतिस्पर्धात्मक क्षमता बढ्ने अपेक्षा व्यक्त गरिएको छ।
यसैबीच, कम्पनीले काठमाडौँको पानीपोखरी मा करिब ६० हजार वर्गफुट क्षेत्रफलमा निर्मित नयाँ केन्द्रीय कार्यालय भवनबाट सेवा सञ्चालन सुरु गरेको छ। दुई तहको पार्किङसहित १२ तलाको उक्त भवन औपचारिक रूपमा उद्घाटन गरिएको कम्पनीले जनाएको छ।
