काठमाडौं- नेपाल प्रिमियर लिग एनपीएलको दोस्रो सिजनमा लुम्बिनी लायन्सले दोस्रो जित दर्ता गराएको छ । शनिबार पोखरा एभेन्जर्सलाई पराजित गर्दै लुम्बिनीले प्रतियोगिताको दोस्रो जित हासिल गरेको हो ।
शनिबार त्रिवि अन्तर्राष्ट्रिय क्रिकेट रङ्गशालामा भएको खेलमा लुम्बिनीले पोखरालाई ३ विकेटले पराजित ग¥यो । पोखराले दिएको १ सय ५१ रनको लक्ष्य लुम्बिनीले खेल सकिन दुई बाँकी छँदै ७ विकेट गुमाएर पूरा ग¥यो ।
यससँगै प्रतियोगितामा लुम्बिनीले ५ मध्ये दुई खेलमा जित निकालेको छ भने तीन खेलमा हार व्यहोरेको छ । यसअघि सिजनको आफ्नो पहिलो खेलमा लुम्बिनीले चितवन राइनोजविरुद्ध ६ विकेटको जित हासिल गरेको थियो । त्यसयता लगातार तीन खेलमा लुम्बिनी पराजित भयो ।
आफ्नो दोस्रो खेलमा लुम्बिनीले कर्णाली याक्ससँग ९ विकेट, तेस्रो खेलमा काठमाडौं गोर्खाजसँग २२ रन र चौथो खेलमा सुदूरपश्चिम रोयल्ससँग ७ विकेटको पराजय व्यहोरेको थियो ।
शनिबार लुम्बिनीलाई जित दिलाउन कप्तान रोहित पौडेलले ४० रन जोडे । ३६ बलको सामना गरेका उनले तीन चौका र दुई छक्का प्रहार गरे । त्यसैगरी, विकेटकिपर समेत रहेका निरोशन डिकवेलाले २२ बलमा ३७ रनको विस्फोटक पारी खेले । यसक्रममा उनले दुई छक्का र दुई चौका प्रहार गरे ।
बलिङतर्फ पोखराका सागर ढकाल, म्याट टेलर र विपिन खत्रीले समान दुई विकेट लिए । जिम्मी निशमले एक विकेट लिए ।
त्यसअघि टस हारेर पहिले ब्याटिङ गरेको पोखराले निर्धारित २० ओभरमा ५ विकेट गुमाउँदै १५० रन बनायो । उसका लागि आडम रोसिङ्टनले सर्वाधिक ८१ रन बनाए । ६३ बलको सामना गरेका उनले सात चौका र पाँच छक्का प्रहार गरे । पोखराका जिम्मी निशमले ५१ बनाए । ३२ बलको सामना गरेका उनले तीन चौका र तीन छक्का प्रहार गरे ।
लुम्बिनीका शेर मल्ल र तिलक भण्डारीले दुई–दुई तथा गुल्बदिन नइबले एक विकेट लिए । यससँगै पोखराले चार खेलमध्ये एकमा मात्रै जित हासिल गरेको छ । सिजनको आफ्नो पहिलो खेलमा पोखरा विराटनगर किङ्ग्ससँग ५३ रनले पराजित भएको थियो । दोस्रो खेलमा सुदूरपश्चिम रोयल्ससँग १८ रनको हार व्यहोरेको पोखराले तेस्रो खेलमा भने जनकपुर बोल्ट्सविरुद्ध २५ रनको जित निकालेको थियो ।
हाल एनपीएलको अंक तालिकामा चार अंकका साथ लुम्बिनी लायन्स पाचौँ स्थानमा छ । दुई अंकका साथ पोखरा भने सातौँ स्थानमा छ ।
