काठमाडौँ । नेपालले पहिलो पटक महिला प्रधानन्यायाधीश पाएको दिन इतिहासको पाना पल्टिएको थियो। त्यति बेला यो पदमा पुगेकी व्यक्ति थिइन् -सुशीला कार्की। आज, न्यायपालिकाको सर्वोच्च पद सम्हालेको करिब आठ वर्षपछि, उनी फेरि अर्को ‘पहिलो’ बन्ने क्रममा छिन् -मुलुकको कार्यकारी प्रमुख बन्ने पहिलो महिला।
२००९ जेठ २५ मा मोरङको शंखरपुरमा किसान परिवारमा जन्मेकी कार्की सात सन्तानमध्ये जेठी थिइन्। विराटनगरमा हुर्किँदै उनले बीपी कोइरालाको परिवार र प्रजातान्त्रिक आन्दोलनसँग निकटता कायम गरिन्। २०२८ सालमा महेन्द्र मोरङ कलेजबाट बीए र २०३१ मा बनारस हिन्दु विश्वविद्यालयबाट राजनीति शास्त्रमा स्नातकोत्तर गरेकी उनले त्यहीँ अध्ययनकै क्रममा काँग्रेस नेता दुर्गा सुवेदीसँग विवाह गरिन्।
२०३४ सालमा त्रिभुवन विश्वविद्यालयबाट कानुनमा स्नातक गरेपछि उनले विराटनगरमा कानुन व्यवसाय सुरु गरिन्। निडर र हक्की स्वभावका कारण चाँडै पहिचान बनाएकी उनले धरानस्थित महेन्द्र बहुमुखी क्याम्पसमा अध्यापन समेत गरिन्। २०६१ सालमा वरिष्ठ अधिवक्ता बनेकी कार्कीलाई तत्कालीन प्रधानन्यायाधीश रामप्रसाद श्रेष्ठले सर्वोच्च अदालतमा ल्याउने प्रस्ताव अघि सारे।
