नवलपरासी – सरकारले नारायणगढ बुटवल सडक विस्तारको लागि १ बर्षको म्याद थप गरेको छ । २०८२ साउन ८ गते सकिएको म्याद एक बर्ष थप गरी २०८३ साउन ७ गतेसम्मलाई थप गरिएको हो ।
सडक आयोजना निर्देशनालयका प्रमुख इन्जिनियर चुडाराज ढकालका अनुसार ७ साउन २०८३ अर्थात २३ जुलाई २०२६ सम्म काम सक्ने सर्तमा म्याद थप गरिएको हो । उनका अनुसार ठेकेदार कम्पनी चाइना स्टेट इन्जिनियरिङ्ग कर्पोरेसनले १ बर्ष भित्र काम सक्ने प्रतिबद्धता जनाएको छ ।
सडक आयोजनाका अनुसार हालको भौतिक प्रगति ७० प्रतिशत रहेको छ । यो अवधिमा योजनाको सम्पूर्ण कार्य सम्पन्न हुने सडक आयोजनाले दावी गरेको छ ।
सुरु ठेक्का सम्झौताअनुसार यो सडक खण्ड ०७९ साउनमै सम्पन्न भइसक्नुपर्ने हो । तर, अहिलेसम्म पनि अलपत्र छ । साउन ८ गते तेस्रो पटक थप गरिएको सडक निर्माणको समय सिमा सकिएपछि सरकारले चौथो पटक म्याद थप गरेको हो ।
स्तरोन्नतिअन्तर्गत हुनुपर्ने मुख्य कामअन्तर्गत ११३ किलोमिटर सडकमा ६४ वटा पुल, चार सय ७४ वटा कल्भर्ट, १ सय ६.१७ किलोमिटर नाली निर्माण हुनुपर्नेछ । त्यस्तै, ७० किलोमिटर ४ लेन, २९ किलोमिटर चार लेनसहित दायाँबायाँ ६–६ मिटरको सर्भिस लेन र दाउन्ने क्षेत्रको १४ किलोमिटरमा तीन लेन स्तरोन्नति हुनुपर्नेछ ।
सरकारले एकबर्ष भित्र सबै काम सक्ने गरी म्याद थप गरेको भए पनि चाइना स्टेट इन्जिनियरिङ्ग कर्पोरेसनले भने एकबर्ष भित्र सबै काम नसकिने जनाएको छ । चाइना स्टेट इन्जिनियरिङ्ग कर्पोरेसन पूर्वी खण्डका इन्जिनियर राकेश झाले १ बर्षमा बढीमा कालोपत्रे र ढकालनको काम सकिने बताए । उनले भने – ‘ढलान र कालो पत्रेको काम सकिएला । रेलिङ्ग हाल्ने, रङ्गरोगन गर्ने, फुटपाथ बनाउने जस्ता कामहरु सकिदैन । त्यसका लागि अझै कम्तिमा ६ महिना समय चाहिन्छ ।’
अहिले दाउन्ने बाहेकका अधिकांश क्षेत्रमा एकतर्फी वा दुई तर्फी सडक कालोपत्रे भएर यात्रा सहज भए पनि दाउन्ने खण्डमा भने अझै सास्ती छ । दाउन्नेको १४ किलोमिटर सडक खण्ड मध्ये पश्चिम खण्डमा ३ किलोमिटर सडक कालो पत्र भएको छ भने पूर्व र पश्चिम खण्ड गरेर २ किलोमिटर सडक एकतर्फी ढलान सकिएको छ । सडक आयोजनाले दशैंसम्म दाउन्नेको सडक खण्ड एकतर्फी कालो पत्रे वा ढलान सकिने दावी गरे पनि आयोजनाले भने दशैं आउन धेरै समय नरहेकोले दशैमा पनि दाउन्ने सडक खण्ड ढलानको काम नसकिने जनाएको छ ।
चाइना स्टेट इन्जिनियरिङ्ग कर्पोरेसन नारायणगढ बुटवल सडक खण्डका इन्जिनियर राकेस झाले भने – अहिलेसम्म हामीलाई दाउन्नेमा २.२ किलोमिटर मात्र काम गर्न अनुमति पाएको छौं । काम गर्ने अनुमति नै नपाइ कसरी सकिएला र ।
उनले अनुमति पाएको २.२ किलोमिटर भने दशैं अगाडि एकतर्फी ढालन सकिने बताए ।
