काठमाडौँ -म्यानचेस्टर युनाइटेड अहिले यस्तो कठिन परिस्थितिबाट गुज्रिरहेको छ, जसको कल्पना सायदै क्लबका समर्थकले गरेका थिए । युरोपेली च्याम्पियन्स लिगअन्तर्गत आज एएस रोमासँग ओल्ड ट्राफोर्डमा प्रतिस्पर्धा गर्न लागेको युनाइटेडका लागि यो खेल केवल तीन अंकको लडाइँ मात्र होइन, प्रशिक्षक माइकल क्यारेकको भविष्यसँग पनि जोडिएको छ ।
रोमासँगको खेलअघि सञ्चारकर्मीसँग कुरा गर्दै क्यारेकले क्लबको वर्तमान अवस्थालाई नै ‘अनौठो’ परिस्थितिको संज्ञा दिएका छन् । युनाइटेडजस्तो क्लबले यस्तो अवस्था सामना गर्नुपर्ला भन्ने कल्पना गर्नसमेत कठिन रहेको उनको भनाइको आशय थियो ।
इंग्लिस प्रिमियर लिगमा चेल्सीसँगको हारपछि पनि क्यारेकले अबको प्राथमिकता खेल जित्नु र अगाडि बढ्नु रहेको बताएका थिए । तर, पछिल्लो समयको प्रदर्शनले उनको नेतृत्वमाथि नै प्रश्न उठ्न थालेको छ ।
क्यारेकका लागि रेलिगेसनको पीडा नयाँ भने होइन । सन् २००२–०३ को सिजन वेस्ट ह्याम युनाइटेड रेलिगेसनमा पर्दा उनी पनि टोलीका सदस्य थिए । उक्त सिजन वेस्ट ह्याम ४२ अंक जोडेर पनि लिगबाट घटुवा भएको थियो । प्रिमियर लिगमा ३८ खेलको संरचना लागू भएयता यति धेरै अंक जोडेर रेलिगेसनमा पर्ने त्यो एकमात्र घटना हो ।
युनाइटेडको अहिलेको अवस्था हेर्दा रेलिगेसनको सम्भावनाबारे समेत चर्चा हुन थालेको छ । टोलीले नौ खेलबाट जम्मा सात अंक जोडेको छ । सन् १९८६ को नोभेम्बरपछि पहिलोपटक युनाइटेड नौ खेलको समाप्तिमा रेलिगेसन क्षेत्रमा पुगेको छ ।
त्यतिबेला प्रशिक्षक रन एटकिन्सन बर्खास्त भएका थिए भने सर एलेक्स फर्गुसनले क्लबको जिम्मेवारी सम्हाल्न सुरु गरेका थिए । फर्गुसनको सुरुवाती समय पनि सहज थिएन । सन् १९८९–९० को सिजन नौ खेलपछि युनाइटेड लिगको १७औँ स्थानमा थियो, जुन त्यसयताको क्लबको कमजोर सुरुवातमध्ये एक हो ।
अहिले क्यारेकको नेतृत्वमा युनाइटेडले सबै प्रतियोगिता गरेर लगातार नौ खेलमा जित निकाल्न सकेको छैन । सन् १९८८–८९ यता क्लबको यो सबैभन्दा खराब प्रदर्शन हो ।
युनाइटेडका समर्थकका लागि अहिलेको संकट बिल्कुलै नयाँ पनि होइन । गत सिजन रुबेन एमोरिमको नेतृत्वमा टोली ३७ खेलपछि लिगको १६औँ स्थानमा थियो । तर, त्यतिबेला रेलिगेसन क्षेत्रमा रहेको लेस्टर सिटीभन्दा युनाइटेड १४ अंकले अगाडि रहेकाले घटुवाको डर त्यति गम्भीर थिएन ।
पछिल्लो सिजन टोटनहमले पनि रेलिगेसनको दबाब सामना गरेको थियो । तर, अन्तिम खेलमा पुगेर मात्र टोली घटुवाबाट जोगिएको थियो ।
यस्तो अवस्थामा क्यारेकको भविष्यबारे पनि अन्योल बढेको छ । रोमाविरुद्धको खेल उनको प्रशिक्षकका रूपमा अन्तिम खेल बन्ने हो कि भन्ने आशंका समेत व्यक्त हुन थालेको छ । युनाइटेडका लागि यो खेल जित्नु केवल अंकतालिकामा सुधार गर्नु मात्र होइन, टोलीभित्रको आत्मविश्वास फर्काउनु पनि हो ।
यदि युनाइटेडले जित निकाल्न सके क्यारेकले तत्कालका लागि राहत पाउनेछन् । तर, अर्को निराशाजनक नतिजा आए क्लबले प्रशिक्षक परिवर्तनको निर्णय लिन सक्ने सम्भावना पनि उत्तिकै छ । ओल्ड ट्राफोर्डमा आज हुने प्रतिस्पर्धाले युनाइटेडको आगामी दिशा र क्यारेकको भविष्यबारे थप संकेत दिनेछ ।
