काठमाडौं। साउदी अरेबियाका लागि प्रस्तावित नेपाली राजदूत गिरीबहादुर सुनारले आफूमाथि लागेका घरेलु हिंसा, आर्थिक अनियमितता र कूटनीतिक मर्यादाविपरीतका आरोप अस्वीकार गरेका छन्। उनले पुरानो व्यक्तिगत विवादलाई अतिरञ्जित गरेर आफ्नो चरित्रहत्या गर्न खोजिएको दाबी गरेका छन्।
बुधबार संघीय संसद्को संसदीय सुनुवाइ समितिमा सांसदहरूले उठाएका प्रश्नको जवाफ दिँदै सुनारले आफूमाथि कुनै प्रहरी कार्यालयमा जाहेरी, पक्राउ पुर्जी वा अदालतबाट सजाय नभएको जिकिर गरे।
राष्ट्रिय स्वतन्त्र पार्टी (रास्वपा) का सांसद मधुकुमार चौलागाईंले सुनारविरुद्ध परेका उजुरीका विषय उठाउँदै घरेलु हिंसा, दलित अधिकारका नाममा आर्थिक लेनदेन, प्रहरी अधिकारीलाई बढुवा गराइदिने भन्दै रकम उठाएको तथा सांसद बनाइदिने प्रलोभनमा ठगी गरेको आरोपबारे स्पष्टीकरण मागेका थिए।
चौलागाईंले ‘हाम्रो नेपाल पार्टी’ को केन्द्रीय सदस्य रहेको र जर्मनीबाट डिपोर्ट भएको भनिएको विषयले नेपालको कूटनीतिक छविमा पार्न सक्ने असरबारे पनि प्रश्न गरेका थिए।
जवाफमा सुनारले आफू दशकौँदेखि महिला हिंसाविरुद्धको अभियानमा सक्रिय रहेको दाबी गरे। उनले पाँच हजारभन्दा बढी महिलालाई आत्मरक्षाको तालिम दिएको तथा महिला अधिकारसम्बन्धी लेख र पुस्तक प्रकाशन गरेको विवरण प्रस्तुत गरे।
एक महिलासँग टेलिफोनमा भनाभन भएको पुरानो घटनालाई महिला हिंसाका रूपमा प्रस्तुत गरिएको उनको तर्क थियो। ओशो तपोवनसम्बन्धी पुरानो विवादमा अदालतबाट मुद्दा हारेकी महिलाले प्रतिशोध साँधेर आफ्नो वृत्तिविकास रोक्न खोजेको आरोपसमेत उनले लगाए।
सुनारले मेलम्ची खानेपानी आयोजनामा सामाजिक सुरक्षा विज्ञका रूपमा काम गरेको र २०७२ सालको भूकम्पका बेला २० देखि २५ जनाको उद्धारमा संलग्न भएको विवरण पनि समितिमा प्रस्तुत गरे। दलित अधिकार, अन्तरजातीय विवाह र लैङ्गिक समानताका क्षेत्रमा अध्ययन तथा अनुसन्धान गरिरहेको उल्लेख गर्दै उनले आफूमाथि लगाइएका आर्थिक र राजनीतिक आरोप निराधार रहेको दाबी गरे।
