काठमाडौं। नेपाल प्रिमियर लिग (एनपीएल) को तेस्रो संस्करण नजिकिँदै गर्दा कीर्तिपुरस्थित त्रिभुवन विश्वविद्यालय (टियु) अन्तर्राष्ट्रिय क्रिकेट मैदानको स्वरूप फेरिन थालेको छ । कात्तिक ९ देखि मंसिर ५ गतेसम्म हुने प्रतियोगितालाई लक्षित गर्दै मैदान स्तरोन्नति, प्यारापिटमा नयाँ सिट जडान, पिच तथा आउटफिल्ड व्यवस्थापन र प्रवेशद्वार निर्माणको काम तीव्र पारिएको छ ।
प्यारापिटमा पहेंलो, रातो, सुन्तला र सेतो रंगका हजारौं बकेट सिट जडान भइसकेका छन् । मैदानको आकारअनुसार व्यवस्थित गरिएका सिटले प्यारापिटलाई आकर्षक बनाएको छ । प्रत्येक सिटमा नम्बर राखेर दर्शकले आफ्नो स्थान सहजै पहिचान गर्न सक्ने व्यवस्था मिलाइँदैछ ।
प्रतियोगितालाई ध्यानमा राख्दै पिच स्क्वायर र आउटफिल्डको मर्मत तथा व्यवस्थापनलाई पनि प्राथमिकता दिइएको छ । मैदानकर्मीले नियमित रूपमा लन मोवर र रोलर प्रयोग गरी घाँसको उचाइ र पिचको कडापन मिलाइरहेका छन् । आउटफिल्डमा आवश्यक पानी र मलखादको व्यवस्थापन गर्दै खेलका लागि उपयुक्त सतह तयार पारिँदैछ ।
मैदान परिसरमा दर्शक मञ्च, खेलाडी प्रवेशमार्ग, कमेन्ट्री बक्स, टेलिभिजन क्यामेरा प्लेटफर्म र विशिष्ट अतिथि लाउन्ज निर्माणको काम पनि अघि बढेको छ । विदेशी कमेन्टेटर तथा टेलिभिजन प्राविधिकका लागि वातानुकूलित र आधुनिक सुविधासहितका कार्यकक्ष तयार पारिँदैछन् ।
एनपीएलको तयारीको प्रभाव मैदानबाहिर पनि देखिन थालेको छ । काठमाडौं–कीर्तिपुर सडकमा मुख्य प्रायोजक तथा विभिन्न फ्रेन्चाइज टोलीका खेलाडीका तस्बिरसहितका स्वागतद्वार र प्रचार सामग्री राखिएका छन् । सडकका बिजुलीका पोलमा समेत एनपीएलका ब्यानर टाँसिएका छन् ।
ठूलो संख्यामा दर्शक आउने अपेक्षासहित सुरक्षा व्यवस्थालाई पनि कडाइ गरिँदैछ । मैदानमा सीसीटीभी, मेटल डिटेक्टर र सुरक्षा जाँचको व्यवस्था गरिनेछ । डिजिटल टिकटमार्फत दर्शकले आफ्नो गेट र सिट नम्बर पहिचान गर्न सक्ने व्यवस्था मिलाइँदैछ भने सवारीसाधन पार्किङका लागि कीर्तिपुर क्षेत्रमा स्थान निर्धारण गरिएको छ ।
एनपीएलको तेस्रो संस्करण सुरु भएसँगै नेपाली क्रिकेटको सबैभन्दा ठूलो घरेलु फ्रेन्चाइज प्रतियोगिताका लागि टियु मैदान नयाँ स्वरूपमा प्रस्तुत हुनेछ।
