एजेन्सी । क्रिस्टियानो रोनाल्डोले पोर्चुगलको राष्ट्रिय फुटबल टोलीको प्रशिक्षण क्याम्प छाडेका छन्। बिहीबार डेनमार्कविरुद्ध हुने खेलअघि उनले टोलीबाट बाहिरिने निर्णय गरेका हुन्।
रोनाल्डोले नेसन्स लिगको पहिलो खेलमा वेल्सविरुद्ध सुरुवाती खेलाडीका रूपमा खेलेका थिए। पोर्चुगलले उक्त खेल १–० ले जित्दा उनी ६७औँ मिनेटमा मैदानबाट बाहिरिएका थिए। त्यसपछि नर्वेविरुद्ध २–१ को जितमा भने उनी बेन्चमा रहे पनि मैदान प्रवेश गरेनन्।
नर्वेविरुद्धको खेलपछि रोनाल्डो र मुख्य प्रशिक्षक जोर्जे जेसुसबीच सम्बन्धमा चिसोपना आएको खबर सार्वजनिक भएका थिए। खेलअघि जेसुसले रोनाल्डोलाई प्रयोग गर्ने योजना रहेको बताएका थिए। तर, बुधबारको पत्रकार सम्मेलनमा उनले रोनाल्डोसँग यस अन्तर्राष्ट्रिय ब्रेकमा उनको भूमिकाबारे छलफल भइसकेको र डेनमार्कविरुद्ध पनि उनी नखेल्ने बताएका थिए।
रोनाल्डोले सोमबार र मंगलबार टोलीका अन्य खेलाडीबाट अलग रहेर प्रशिक्षण गरेका थिए। यसैबीच, पोर्चुगल फुटबल महासंघका अध्यक्ष पेड्रो प्रोएन्साको उपस्थितिमा रोनाल्डो र जेसुसबीचको विवाद समाधानका लागि बैठक भएको खबर पनि सार्वजनिक भएको थियो।
बैठकपछि रोनाल्डोले सामाजिक सञ्जालमार्फत आफूले राष्ट्रिय टोलीको प्रशिक्षण क्याम्प छाड्ने निर्णय गरेको जानकारी दिएका हुन्। उनले महासंघका अध्यक्षसँगको कुराकानीपछि टोलीबाट बाहिरिने निर्णय गरेको जनाउँदै यसबारेको वास्तविक कारण उपयुक्त समयमा पोर्चुगलका समर्थकलाई बताउने उल्लेख गरेका छन्।
साथै, उनले पोर्चुगल र आफ्ना सहकर्मीलाई आगामी खेलका लागि शुभकामना दिएका छन्।
रोनाल्डो पुरुष अन्तर्राष्ट्रिय फुटबलमा सर्वाधिक गोल गर्ने खेलाडी हुन्। उनले पोर्चुगलका लागि १४६ अन्तर्राष्ट्रिय गोल गरिसकेका छन्। उनी आफ्नो व्यावसायिक करिअरमा १ हजार गोल पूरा गर्ने लक्ष्यमा छन्।
रोनाल्डोले अब डेनमार्कविरुद्धको खेलसँगै अक्टोबर ४ मा हुने नर्वेविरुद्धको दोस्रो खेल पनि गुमाउनेछन्। पोर्चुगल नेसन्स लिगको समूह ‘ए४’ मा दुई खेलबाट ६ अंक जोड्दै शीर्ष स्थानमा छ। प्रशिक्षक जेसुसको नेतृत्वमा टोलीले दुवै खेल जितेको छ।
