काठमाडौँ– अष्ट्रेलियामा जारी तेस्रो संस्करणको टप एन्ड टी–२० सिरिजअन्तर्गत नेपाल ‘ए’ ले आज भिक्टोरिया सिए–११ विरुद्ध प्रतिस्पर्धा गर्दैछ । डार्विनस्थित मारारा क्रिकेट मैदानमा हुने खेल दिउँसो १ः१५ बजे सुरु हुनेछ ।
प्रतियोगिताको सेमिफाइनल दौडबाट बाहिरिसकेको नेपाल आजको खेल जित्दै प्रतियोगिताको सुखद अन्त्य गर्ने योजनामा छ । नेपाल पाँच खेलबाट चार अङ्क जोडेर तालिकाको सातौँ स्थानमा रहेको छ ।
नेपालले प्रतियोगितामा अहिलेसम्म पाँच खेल खेलेको छ । जसमा तीन खेलमा पराजित हुँदा दुई खेलमा जित हासिल गरेको छ । पहिलो खेलमा नेपाल नर्दन टेरिटोरी स्ट्राइकसँग आठ विकेटले तथा दोस्रो खेलमा बङ्गलादेश हाइपरफर्मेन्स–११ सँग नौ विकेटले पराजित भएको थियो ।
त्यसपछि नेपालले होबार्ट हरिकेन्स एकेडेमीलाई ३९ रनले पराजित गर्दै प्रतियोगितामा पहिलो जित निकालेको थियो । चौथो खेलमा अष्ट्रेलियन क्यापिटल टेरिटोरी (एसीटी) लाई चार विकेटले हराउँदै नेपालले लगातार दोस्रो जित दर्ता गरेको थियो ।
तर, पाँचौँ खेलमा नेपाल हैदरावाद किङ्समेन एकेडेमीसँग ३१ रनले पराजित भयो । त्यसैले आज भिक्टोरिया सिए–११ लाई हराएर नेपाल प्रतियोगिताको अन्त्य जितसहित गर्ने लक्ष्यमा छ ।
टप एन्ड टी–२० सिरिजका लागि नेपाल ‘ए’ को कप्तानी अनिलकुमार शाहले गरिरहेका छन् । टोलीमा कुशल भुर्तेल, पवन सर्राफ, कुशल मल्ल, मयन यादव, दीपक डुम्रे, लोकेश बम, शाहब आलम, राशिद खान, आकाश चन्द, रिजन ढकाल, नारायण जोशी, विपिन खत्री, तृतराज दास र युवराज खत्री रहेका छन् ।
