काठमाडौँ। बाढी तथा पहिरोका कारण अवरुद्ध विद्युत् सेवा सुचारु गर्न नेपाल विद्युत् प्राधिकरणले वैकल्पिक माध्यमबाट आपूर्ति पुनःस्थापनाको काम तीव्र बनाएको छ। नुवाकोट र धादिङका प्रभावित धेरै क्षेत्रमा विद्युत् सेवा पुनः सञ्चालनमा आएको प्राधिकरणले जनाएको छ।
प्राधिकरणका सदस्य अंशुकिरण शाहीका अनुसार क्षतिग्रस्त संरचनाको विकल्प खोज्दै विद्युत् आपूर्ति पुनः सञ्चालन गर्ने काम भइरहेको छ। नुवाकोटका खरानीटार, समुद्रटार, चौघडा, लिखु र पञ्चकन्यामा सिन्धुपाल्चोकबाट वैकल्पिक लाइन विस्तार गरी विद्युत् सेवा सुचारु गरिएको उनले बताए।
बालाजु र त्रिशूलीको ६६ केभी प्रसारण लाइनबाट ११ केभी लाइन तानेर नुवाकोटका अन्य क्षेत्रमा समेत बिहीवार अपराह्नसम्म विद्युत् पुर्याउने लक्ष्य रहेको प्राधिकरणले जनाएको छ।
पृथ्वी राजमार्गअन्तर्गत मलेखु, गजुरी र मुग्लिङ क्षेत्रमा पनि विद्युत् सेवा पुनः सञ्चालनमा आएको छ। धादिङबेसी–रातामाटे ३३ केभी प्रसारण लाइन मर्मत गरी सञ्चालनमा ल्याएपछि ती क्षेत्रमा विद्युत् आपूर्ति सुचारु भएको शाहीले बताए।
रसुवामा भने क्षतिको विवरण संकलन भइरहेको छ। प्राधिकरणले गृह मन्त्रालय र राष्ट्रिय विपद् जोखिम न्यूनीकरण तथा व्यवस्थापन प्राधिकरणसँग समन्वय गरी एक साताभित्र रसुवामा विद्युत् सेवा पुनःस्थापना गर्ने योजना बनाएको छ। यद्यपि, अहिले रसुवामा उद्धार कार्यलाई प्राथमिकता दिइएको प्राधिकरणले जनाएको छ।
त्रिशूली–३ ‘ए’ लगायत जलविद्युत् आयोजनामा सम्पर्कविहीन कर्मचारी तथा प्रभावित स्थानीयको उद्धारका लागि नेपाली सेनासँग समन्वय भइरहेको छ। प्राधिकरणका कार्यकारी निर्देशक र उपकार्यकारी निर्देशकसहितको उच्चस्तरीय टोली नुवाकोटमै खटिएर विद्युत् आपूर्ति र क्षतिको अवस्थाको अनुगमन गरिरहेको छ।
