काठमाडौँ । रसुवाको भोटेकोशी नदीमा आएको भीषण बाढीबाट प्रभावित नागरिकका लागि नेपाली सेना र भारत सरकारले राहत सामग्री पठाएका छन्। बाढीमा परी घाइते तथा जोखिममा परेका नागरिकको उद्धारका लागि बिहीबार बिहानैदेखि नेपाली सेना र निजी क्षेत्रका हेलिकप्टर परिचालन गरिने भएको छ।
नेपाली सेनाका आठ वटा ट्रकमार्फत करिब आठ टन राहत सामग्री प्रभावित क्षेत्रतर्फ पठाइएको छ। राति नै पठाइएका सामग्रीमा ५०० थान मच्छरदानी, एक हजार थान बालबालिकाका डिग्निटी किट, २२० थान स्लिपिङ ब्याग, ५०० थान कम्बल, १० थान प्लास्टिक सिट, १०० थान त्रिपाल, ५०० थान सोलार बत्ती, ५०० थान सोलार बत्तीका प्लेट र ३० केभिए क्षमताको एक थान जेनेरेटर छन्।
बाढी प्रभावित नागरिकलाई तत्काल राहत तथा मानवीय सहायता उपलब्ध गराउने उद्देश्यले सामग्री व्यवस्थापन तथा ढुवानी गरिएको हो। गृह मन्त्रालयका अनुसार राहत व्यवस्थापन तथा ढुवानी गृहमन्त्री सुधन गुरुङको प्रत्यक्ष निगरानीमा भइरहेको छ।
भोटेकोशी बाढीपीडितका लागि भारत सरकारले १० टन राहत सामग्री नेपाल पठाएको छ। उक्त सामग्री बिहीबार त्रिभुवन अन्तर्राष्ट्रिय विमानस्थलमा नेपालका लागि भारतीय राजदूत नवीन श्रीवास्तवले संस्कृति, पर्यटन तथा नागरिक उड्डयनमन्त्री खड्क राज पौडेल ‘गनेस’लाई हस्तान्तरण गरेका हुन्।
