काठमाडौं। नेकपा एमालेका सांसद पुष्पराज कँडेलले तिब्बततर्फबाट आएको बाढीबाट प्रभावित नागरिकको तत्काल खोज तथा उद्धार, राहत, पुनःस्थापना र पुनर्निर्माणमा जुट्न सरकारलाई आग्रह गरेका छन्। उनले विपद्को सामना गर्न प्रतिपक्षी दलका तर्फबाट सरकारलाई पूर्ण सहयोग गर्ने प्रतिबद्धता जनाएका छन्।
प्रतिनिधिसभाको बुधवारको बैठकमा बोल्दै कँडेलले बाढीबाट मानवीय तथा भौतिक क्षतिसँगै प्रभावित क्षेत्रमा मनोवैज्ञानिक असरसमेत परेको बताए। धादिङमा अहिलेसम्म मानवीय क्षतिको विवरण प्राप्त नभए पनि ठूलो भौतिक क्षति भएको उनले जानकारी दिए।
बाढीले धादिङका धेरै पुल बगाएको र जिल्ला सदरमुकामसँगको सम्पर्क विच्छेद भएको उनले बताए। ‘धादिङमा अहिलेसम्म मानवीय क्षति भएको कुनै जानकारी आएको छैन । भौतिक क्षति थुप्रै भएको छ,’ कँडेलले भने।
उनले धादिङभन्दा नुवाकोट र नुवाकोटभन्दा रसुवामा बढी क्षति भएको अनुमान गर्न सकिने बताए। सरकारले विपद्को खोज तथा उद्धारसँगै राहत, पुनःस्थापना र पुनर्निर्माणका कामलाई प्राथमिकताका साथ अघि बढाउनुपर्ने उनको भनाइ थियो।
कँडेलले विपद्को यस कठिन घडीमा सरकारलाई आवश्यक सहयोग गर्न प्रतिपक्षी दलहरू तयार रहेको बताए।
तिब्बततर्फबाट रसुवाको भोटेकोशीमा आएको बाढी नुवाकोट र धादिङ हुँदै चितवनसम्म पुगेको छ।
