काठमाडौँ — भारतका प्रधानमन्त्री नरेन्द्र मोदीले नेपालमा बाढीपहिरोका कारण भएको जनधनको क्षतिप्रति दुःख व्यक्त गर्दै पीडितप्रति समवेदना प्रकट गरेका छन्। उनले नेपाललाई आवश्यक सबै प्रकारका मानवीय सहायता उपलब्ध गराउन भारत तयार रहेको बताएका छन्।
प्रधानमन्त्री मोदीले नेपालका प्रधानमन्त्रीसँग कुराकानी गर्दै विपद्को कठिन परिस्थितिमा भारत नेपाली नागरिकको साथमा रहेको उल्लेख गरेका हुन्।
सामाजिक सञ्जालमार्फत उनले उद्धार तथा राहतका लागि भारत र नेपालका सम्बन्धित टोलीबीच निकट समन्वय भइरहेको जानकारी दिएका छन्।
मोदीले लेखेका छन्, “प्रधानमन्त्रीसँग कुराकानी गर्दै नेपालमा बाढीका कारण भएको जनधनको क्षतिप्रति समवेदना व्यक्त गरेको छु। यस कठिन समयमा भारतका जनता नेपालका हाम्रा दाजुभाइ तथा दिदीबहिनीहरूको साथमा उभिएका छन्। भारत नेपाललाई सम्भव भएसम्मका सबै मानवीय सहायता प्रदान गर्न तयार छ। हाम्रा टोलीहरू उद्धार र राहत कार्यमा निकटताका साथ समन्वय गरिरहेका छन्।”
नेपालमा पछिल्ला दिनमा परेको अविरल वर्षाका कारण विभिन्न क्षेत्रमा बाढी र पहिरो जाँदा ठूलो जनधनको क्षति भएको छ। विपद्का कारण प्रभावितको उद्धार तथा राहत कार्य जारी रहेका बेला भारतले आवश्यक सहयोगका लागि तयार रहेको जनाएको हो।
